MGA SALIK GIKAN SA HISTORIYA NI JOSEPH SMITH, AN PROPETA
Historiya kan Simbahan, Vol. 1, Mga Tsapter 1-5
Si Joseph Smith nagtaram kan saiyang mga ninuno, mga miyembro kan pamilya, asin kan saindang amay na estaran---Sarong naiibang kasibutan manungod sa relihiyon an nagdadanay sa sulnupang parte kan New York---Siya determinadong maghanap nin kadunungan siring sa pinagsasabi ni Santiago---An Ama asin an Ake nagpahiling asin si Joseph pinangapudan sa saiyang propetikong ministeryo. (Mga Bersikulo 1-20.)
1 Nin huli sa kadakulon na mga bareta na ipinagbabalangibog kan may maraot na isip asin mapagdesinyong mga persona, na may relasyon sa pag-angat asin progreso kan An Simbahan ni Jesukristo nin Mga Banal sa Huring-aldaw, na gabos na ini pinagdesinyo kan mga parasurat kaini tanganing impluwensiyahan laban sa karakter kaini bilang sarong Simbahan asin an progeso kaini sa mundo---Ako nahikayat na magsurat kaining historiya, tanganing dae pag-abusohon an isip kan publiko, asin ipamugtak an gabos na mga parahapot sa katotoohan na makaaram sa mga pangyayari, siring na sinda nangyari, na may relasyon pareho sa sadire ko asin sa Simbahan, habang ako igwa kaining mga pangyayari na sakuyang nakakaputan.
2 Sa historiyang ini ako mapresentar nin kadakol na mga pangyayari na may relasyon kaining Simbahan, sa katotoohan asin sa pagkamatanos, siring na sinda nangyari na, o siring na sinda nangyari sa presente, bilang ngonyan [1838] ikawalong taon magpoon pa sa organisasyon kan nasambit na Simbahan.
3 Ako iminundag sa taon nin satuyang Kagurangnan sanribo walong gatos asin lima, sa ikaduwang pulo may tolo kan aldaw nin Disyembre, sa banwaan nin Sharon, probinsiya nin Windsor, Estado kan Vermont...An sakuyang ama, si Joseph Smith, Sen., naghale sa Estado kan Vermont, asin naglipat pasiring sa Palmyra, probinsiya nin Ontario (ngonyan Wayne), sa Estado nin New York, kunsoarin na ako kaidto yaon sa ikasampulong taon, o baya sa panahon na iyan. Sa laog nin apat na taon matapos kan pag-abot kan sakuyang ama sa Palmyra, siya naglipat kaiba an saiyang pamilya pasiring sa Manchester sa kaparehong probinsiya nin Ontario---
4 An saiyang pamilya na konsistido nin sampulo may sarong kalag, kairiba, an sakuyang ama, si Joseph Smith; an sakuyang ina, si Lucy Smith (na an apelyedo, kaidto bago an saiyang kasal, Mack, akeng babaye ni Solomon Mack); an sakuyang mga akeng lalake, si Alvin (na nagadan kan Nobiyembre 19, 1823, sa ika-26 na taon kan saiyang edad), si Hyrum, ako, si Samuel Harrison, si William, si Don Carlos; asin an sakuyang mga tugang na babaye, si Sophronia, Catherine, asin Lucy.
5 Kan panahon sa ikaduwang taon matapos kan samuyang paghale sa Manchester, igwa sa lugar na kun saen kami nag-eerok nin sarong naiibang kasibutan sa subheto nin relihiyon. Ini nagpoon sa mga Metodista, pero dae naghaloy nagin heneral sa pag-iriba nin gabos na mga sekta sa rehiyon na iyan nin bansa. Tunay, an bilog na distrito nin bansa baga apektado kaini, asin darakulang pangon an nagkasararo kain saindang mga sadire sa manlaenlaen na mga relihiyosong partido, na nakapaglalang nin bako sanang sadit na kasibutan asin dibisyon sa kairibahan nin mga katawohan, an iba nagkukurahaw, “Uya, madya!” asin an iba pa, “Uya, duman!” An iba nagdiskusyunan para sa Metodistang pagtubod, an iba man para sa Presbiterio, asin an iba para sa Baptista.
6 Nin huli ta, bako sana sa dakulang pagkamoot na an mga konberto kaining manlaenlaen na mga pagtubod nagpahayag sa panahon kan saindang konbersyon, asin an dakulang tungkos na ipinagpapahiling kan saindang kanya-kanyang klerigo, na mga aktibong naninindugan asin ipinagbabalangibog ining ekstraordinasyong eksena nin relihiyosong pagmamate, na tangani baya na an gabos magin konbertido, siring na sinda maogmang pinag-aapod ini, tuguti sinda na makibale sa kun anong sekta na saindang nakursunadahan; alagad kan an mga konberto nagpoon na sa pagdakol, an iba sa sarong partido asin an iba sa iba man, ini nahiling na an garo baga na an marahayon na mga pagmamate kan parehong mga kapadean asin mga konberto baya nagin kasagin-saginan kesa tunay; nin huli ta sarong eksena nin dakulang kalibongan asin maraot na pagmamate nagpoon---an pade nakikiiwal sa kapwa pade, asin konberto laban sa konberto; na tangani baya na an gabos nindang marahayon na mga pagmamate sa lambang saro, kun sinda igwa kaini kaidto, kabilogan na nagkawarara sa sarong barangayan nin mga tataramon asin sarong kontes nin mga opinyon.
7 Ako sa panahon na ini yaon sa sakuyang ikalimang pulo may limang taon. An pamilya kan sakuyang ama nadara sa Presbiteryong pagtubod, asin apat sainda nagbale sa simbahan na iyan, kairiba, an sakuyang ina, Lucy; an sakuyang mga tugang na lalakeng si Hyrum asin Samuel Harrison; asin an sakuyang tugang na babayeng si Sophronia.
8 Sa panahon na ini nin dakulang kasiributan an sakuyang isip pinag-apudan para sa seryosong repleksyon asin dakulang karinsalan; pero maski na ngani na an sakuyang mga pagmamate pairarom asin minsan makamondoon, giraray ako nagrayo kan sakuyang sadire na magin alangan gikan sa gabos na ining mga partido, minsan man ako nag-atendir kan saindang nagkapirang mga pagtitiripon-tipon habang an okasyon minatugot pa. Sa proseso kan panahon an sakuyang isip nagin baga parsiyal sa Metodistang sekta, asin ako nakamate nin nagkapirang pagmawot na magin saro kaiba ninda; pero grabe kadakulang gayo an kalibongan asin iriwalan sa pag-iribahan kan iba-ibang mga denominasyon, na ini imposible para sa sarong personang hoben na arog ko, asin bako pang gayo sanay sa mga tawo asin mga bagay, na makaabot sa anuman na siyertong konklusyon na kun siisay an tama asin kun siisay an sala.
9 An sakuyang isip may mga panahon na grabeng gayo an pagkasibot, an kinurahaw asin tanyog grabeng gayo asin minadanay. An mga Presbiteryano mas desididohon kesa sa mga Baptista asin Metodista, asin ginagamit an gabos na mga kapangyarihan pareho kan rason asin sopistriya tanganing prubaran an saindang mga sala, o, baya, himoon na an mga katawohan mag-isip na sinda yaon sa sala. Sa ibang banda, an ma Baptista asin mga Metodista sa saindang parte tungkos an kahigosan sa paghihingoha na ipag-establisa an saindang sadireng mga pagtubod asin disprubado an gabos na iba.
10 Sa katahawan kaining giyera nin mga tataramon asin tanyog na mga opinyon, ako minsan nagsabi sa sakuyang sadire: Ano baya an gigibohon ko? Siisay baya sa gabos na ining mga partido an tama; o, sinda gabos saralang parareho? Kun an saro sainda tama, arin baya, asin paano ako makaaram kaini?
11 Habang ako naghihingoha sa irarom nin makuniot na kasakitan na kausa kan mga kontes kaining mga partido nin mga relihiyonista, ako sarong aldaw nagbabasa kan Surat ni Santiago, enot na tsapter asin ikalimang bersikulo, na mababasa: Kun an siisay saindo na nagkukulang nin kadunungan, tuguti siyang maghapot sa Diyos, na nagtatao sa gabos na mga tawo nin bulanos, asin dae nambabasol; asin ini ipagtatao saiya.
12 Dae pa nangyari sa arinman na linya nin kasuratan na minaabot na may grabeng kapangyarihan sa puso nin tawo kesa kaini na nangyari sa panahon na ini sako. Ini garo baga naglaog na igwa nin dakulang puwersa sa kairaroman nin lambang pagmamate nin sakuyang puso. Ako nag-atid-atid kaini giraray sa giraray, nakakaaram na kun siisay na persona na nagkakaipo nin kadunungan gikan sa Diyos, ako iyo; pero kun paano ini gibohon ako dae nakakaaram, asin laen lang na ako makakakua nin dagdag na kadunungan kesa sa sakong dara na, ako dae nanggad nakakaaram; nin huli ta an mga paratukdo nin relihiyon kan manlaenlaen na mga sekta nakakasabot sa kaparehong mga linya nin kasuratan na grabeng kaibahan na tanganing destrosohon an gabos na katiwalaan sa paghuhusay sa kahaputan sa paagi kan pag-apela sa Bibliya.
13 Sa kahaluyan ako nag-abot sa konlusyon na ako kaipong yaon sana sa kadikloman asin kalibongan, o baya ako kaipong gumibo siring sa pinaghulit ni Santiago, na iyo, an paghapot sa Diyos. Ako sa kahaluyan nakaabot sa determinasyon na “maghapot sa Diyos”, na sa katunayan na kun siya nagtatao nin kadunungan sa saind na nagkukulang nin kadunungan, asin nagtatao nin bulanos, asin dae nambabasol, ako puwedeng magprubar.
14 Kaya, uyon kaini, an sakuyang determinasyon na maghapot sa Diyos, ako nagpaduman sa mga kakahuyan tanganing himoon an bagay na ini. Ini kaidtong kaomagahon nin sarong magayunon, maaliwalas na aldaw, sa amay nin tagsibol kan sampulo may walong gatos asin duwang pulo. Ini kaidto an enot na pagkakataon kan sakuyang buhay na ako naghimo kan bagay na arog kaini, nin huli ta sa katahawan an gabos kong kahaditan ako dae pa nanggad nakapaghimo na prubaran an may boses na pagpapangadye.
15 Matapos na ako nakapagduman na sa lugar na kun saen ako nagplanong magduman, pinaghiling ko an kapaliputan ko, asin nahiling ko sa sadire na solo, ako nagluhod asin nagpoon na magdulot kan mga kamawotan nin sakuyang puso sa Diyos. Ako bihirang nakagibo kaini, kunsoarin na tulos ako pinagkugos nin ibang kapangyarihan na bilog na nakapagdaog sako, asin igwa kaining pambihirang impluwensiya na nangingibabaw sako na siring baga sa ginagapos an sakuyang dila na tangani na ako dae na makapagtaram. Mahib-ugon na kadikloman an nagkatiripon sa palibot ko, asin ini bagang gayo para sako iyo an sarong panahon na baga ako pinagtalaga sa hidaling kapahamakan.
16 Pero, pinaghingoha kan bilog kong mga kapangyarihan na mag-apod sa Diyos na tanganing ipagligtas ako paluwas sa kapangyarihan kaining kaiwal na nagkukugos sako, asin sa pinakamomento kunsoarin ako handa nang maglubog pasiring sa kawaraan asin pabayaan an sakuyang sadire sa kapahamakan---bako sana sa imahinaryong pagkarunot, kundi pasiring sa kapangyarihan kan ibahon na aktuwal na nilalang na gikan sa dae nahihiling na mundo, na igwa kan marbelosong kapangyarihan siring sa dae ko naagihan sa arinman na nilalang---sa arog kaining momento nin dakulang alarma, ako nakahiling nin sarong harigi nin liwanag na eksaktong yaon sa ibabaw nin sakuyang payo, labaw sa kaliwanagan nin saldang, na nagbababa paluhay-luhay sagkod na ini naglukob sako.
17 Ini sa dae nahaloy nagluwas na ako managboan an sadire ko na nailigtas na gikan sa kapangyarihan nin kaiwal na nakakugos sakong panggapos. Kunsoarin na an liwanag nakalukob na sako ako nakahiling nin duwang mga Personahe, na mga kaliwanagan asin kamurawayan minapalaen sa bilog na deskripsyon, na nakatindog labaw sako sa paros. An saro sainda nagtaram sako, pinag-aapod ako sa paagi nin pangaran asin nagsabi, pinagtukdo an saro---Iyo ini an sakuyang Namumutan na Ake. Dangoga baya Siya!
18 An sakuyang obheto sa pagduman tanganing maghapot sa Kagurangnan iyo na maaraman kun arin baga sa gabos na mga sekta na tama, na tangani baya na ako puwedeng makaaram kun arin baga an balehan. Sa dae nahaloy, kun kaya, ako nakamangno sa sadire ko, na tangani baya nakahingohang makapagtaram, ta ako naghapot sa mga Personahe na nakatindog na labaw sako sa liwanag, kun arin baga sa gabos na mga sekta an tama (nin huli ta sa panahon na ini dae pa naglaog sa sakuyang puso na an gabos sala)---asin arin baya an sakong balehan.
19 Ako sinimbag na ako dae kaipong makibale sainda, nin huli ta sinda gabos sala; asin an Personahe na nagkipag-olay sako nagsabi na an gabos na saindang mga kredo sarong abominasyon sa saiyang paghiling; na sinda na mga paratukdo gabos koraptu; na: “Sinda nagdudulok paharani sako sa paagi kan saindang mga ngabil, pero an saindang mga puso harayo gikan sako, sinda nagtutukdo bilang mga doktrina kan mga kasugoan nin mga tawo, na igwa nin sarong kapormahan nin pagkamaka-diyos, pero sinda nagsisikwal sa kapangyarihan kaini.”
20 Siya giraray nagbawal sako na makibale sa arinman sa sainda; asin kadakol pang ibang bagay na siya nagsabi sa sako, na ako dae makapagsurat sa panahon na ini. Kunsoarin na ako makamangno sa sadire ko giraray, ako nakanagbo sa sadire na nakahigda sa sakuyang likod, na nakahiling paitaas sa langit. Kunsoarin na an liwanag naghale na, ako nawaraan nin kusog; pero sa dae pa naghaloy nagkaigwa na baya nin kadikit, ako nag-uli na sa harong. Asin habang ako nakadungog sa may lugar nin kalayo, an ina ko naghapot kun ano an nangyari. Ako nagsimbag, “Bayae sana po, an gabos marahayon---ako marahayon lang na gayo.” Dangan ako nagsabi sa sakuyang ina, “Ako nakaaram para sa sadire ko na an Presbiteryanismo bakong totoo.” Ini garo baga na an kalaban nakakamangno, na sa grabeng amay na peryodo nin sakuyang buhay, na ako pinagdestino tanganing prubado bilang sarong paradisturbo asin sarong paribok nin saiyang kahadean; ta kun laen tadaw baya ta dapat na an mga kapangyarihan nin kadikloman pinagkasararo laban sako? Tadaw baya ta an oposisyon asin persekusyon nag-alsa laban sako, haros poon sa sakuyang kainosentehan?
An ibang mga parabalangibog asin ibang mga paratukdo nin relihiyon sinikwal an kasaysayan nin Enot na Bisyon---An persekusyon nagkapatong-patong laban ki Joseph Smith---Siya nagpatotoo sa reyalidad kan bisyon. (Mga Bersikulo 21-26)
21Sa dae nagdakol na mga aldaw pagkatapos na ako nagkaigwa kaining bisyon, ako nangyaring yaon sa kumpanya nin saro sa mga Metodistang paratukdo, na aktibong maray kaidto pa sa nasambit na relihiyosong kasibutan; asin, nakikipag-olay saiya kan subheto nin relihiyon, ako nagkaigwa nin okasyon na ipagtao saiya an kasaysayan kan bisyon na ako nagkaigwa kaidto. Ako grabeng gayo an pagkataraka kan saiyang pag-uugali; saiyang pinagtratar an sakuyang komunikasyon na bako sanang magianon, kundi may dakulang kaduraan, nagsasabi na idto gabos sa diyablo, na mayo na nin arog kaidtong mga bagay siring baga sa mga bisyon o mga kapahayagan sa mga aldaw na ini; na an gabos na arog kaining mga bagay naglipas na kaiba kan mga apostoles, asin ta dae na makakaigwa pa kan arog sainda.
22 Ako dae nahaloy nakanagbo, kumbaya, na an sakuyang pagsasabi kan estorya nakapagpapukaw nin sarong dakulang bagay nin kadudahan laban sako sa pag-iriba kan mga paratukdo nin relihiyon, asin iyo an nagin kausa nin dakulang persekusyon, na padagos na nagdadagdag; asin maski na ngani na ako saro sanang bakong bistadong akeng lalake, na yaon sa tahaw kan sampulo may apat asin sampulo may limang taon pa sana an edad, asin an sakuyang mga sirkumstansiya sa buhay siring baga sa sarong akeng lalake na mayo pang konsekuwensiya sa mundo, alagad mga tawong yaon sa halangkaw na katindogan nakapagtao nin notisya na awad-awad na tanganing masibot an publikong kaisipan laban sako, asin nakapaglalang nin sarong mapaiton na persekusyon; asin iyo ini komon sa pag-iriba kan gabos na mga sekta---bilog na nagkasararo tanganing ako persigiron.
23 Ini nagkausa baya sako nin seryosong repleksyon, asin minsan poon kaidto, kun guranong gayo baya na ini makangalason na an bakong bistadohon na akeng lalake, na kadikit pa sanang masobra sa sampulo may apat na taon an edad, asin solo sana, na pinagtalaga sa pangangaipo na makakakua nin sarong kadikiton na pangmantiner kan saiyang pang-aro-aldaw na trabaho, na dapat pag-isipan na sarong karakter na igwa nin awad-awad na importansiya tanganing makapagtao nin atensiyon sa mga bantugang mga tawo kan mga pinakabantog na mga sekta kan aldaw, asin sa manera na makapaglalang sainda nin sarong espiritu kan pinakamapaiton na persekusyon asin katuyaan. Pero makangalas man o bako, ini an nangyari, asin ini kun minsan an kausa nin dakulaon na kamondoan nin sakuyang sadire.
24 Kaya lang, ini daeng pagkukulang sarong pangyayari na ako nakahiling nin sarong bisyon. Ako nakapag-isip poon kaidto, na ako nakamate na siring na gayo ki Pablo, kunsoarin na siya naghimo kan saiyang depensa sa atubangan ni Hadeng Agrippa, asin pinagsaysay an kasaysayan kan bisyon na igwa siya kunsoaring na siya nakahiling nin sarong liwanag, asin nakadangog nin sarong boses; pero nagkaigwa sana nin dikit na naniniwala saiya; an iba nagsabi na siya bakong honesto, an iba man nagsabi na siya nabubua; asin siya pinagkarawan asin pinagtuyatuya. Pero an gabos na ini dae nakapagdestroso sa reyalidad kan saiyang bisyon. Siya nakahiling nin sarong bisyon, siya nakakaaram na siya nagkaigwa, asin an gabos na persekusyon na yaon sa irarom nin langit dae makahimong pagbag-uhon ini; asin maski na ngani na sinda dapat na pesigiron siya hanggan magadan, alagad siya nakakaaram, asin makakaaram hanggan sa pinakahuring paghangos, na siya parehong nakahiling nin sarong liwanag asin nakadangog nin sarong boses na nagtataram sa saiya, asin an bilog na mundo dae makakahimong siya paisipon o paniwalaon nin iba.
25 Kaya iyo man idtong nangyari sako. Ako aktuwal na gayong nakahiling nin sarong liwanag, asin sa katahawan kan liwanag ako nakahiling nin duwang mga Personahe, asin sinda sa reyalidad nakipag-olay sako; asin maski na ngani na ako kinaongisan asin persigido nin huli ta nagsasabi na ako nakahiling nin sarong bisyon, alagad ini totoo; asin habang sinda nagpepersigir sako, nagtutuyaw sako, asin nagtataram nin gabos na manera nin karaotan laban sako na palsohon bayang pinagsasabi, ako natulak na makakapagsabi sa sakuyang puso: Tadaw baya ta persigiron ako sa pagsasabi nin totoo? Ako aktuwal na nakahiling nin sarong bisyon; asin siisay man baya ako na makakatagal sa Diyos, o tadaw baya an an mundo nag-iisip na himoon kong ipagsikwal kun ano an aktuwal kong nahiling? Nin huli ta ako nakahiling nin sarong bisyon; ako nakakaaram kaini, asin ako nakakaaram na an Diyos nakakaaram kaini, asin ako dae makakapagsikwal kaini, ni kusugan an boot na gibohon ini; sa dikit ako nakakaaram na sa paagi kan paggigibo kaini ako makakapagpa-anggot sa Diyos, asin maluwas na yaon sa irarom nin kondenasyon.
26 Ako nagkaigwa na ngonyan sa sakuyang isip na banayad na sa mapanungod sa sektaryanong mundo---na ini bako kong katungkulan na makibale sa arinman sainda, kundi magpapadagos na siring sana ako hanggan sa pagsabihan. Ako nakanagbo na an testimonya ni Santiago talagang totoo---na an sarong tawo na nagkukulnag nin kadunungan puwedeng maghapot sa Diyos, asin makakamit, asin dae pinagbabasol.
Si Moroni nagpahiling ki Joseph Smith---An pangaran ni Joseph ipagbabantog para sa karahayan aisn karaotan sa pag-iriba kan gabos na mga nasyon---Si Moroni nagsabi saiya kan Libro ni Mormon asin kan paabuton na mga paghuhukom nin Kagurangnan, asin nagkotar nin kadakol na mga kasuratan---An pinagtaguan na lugar kan bulawan na mga plake ipinagpahayag---Si Moroni nagpadagos sa pagtao nin instruksiyon sa Propeta. (Mga Bersikulo 27-54.)
27 Ako nagpadagos sa pag-atubang kan sakuyang komon na bokasyon sa buhay hanggan sa ika-duwang pulo asin enot kan Septiyembre, sanribo walong gatos asin duwang pulo may tolo, na sa gabos na panahon nagsasapo nin makuring persekusyon sa mga kamot kan gabos na klase nin mga tawo, parehong relihiyoso asin bakong relihiyoso, nin huli ta ako nagpadagos sa pagpatunay na ako nanggad nakahiling nin sarong bisyon.
28 Sa laog nin espasyo kan panahon na nangyaring sa tahaw kan panahon na ako nagkaigwa nin bisyon asin sa taon kan sampulo may walong gatos asin duwang pulo may tolo---habang pinagbabawalan na makibale sa arinman na mga relihiyosong mga sekta kan aldaw, asin bilang yaon sa pinakalumbod na mga taon, asin persigido ninda na dapat kuta nang mga amigo ko asin pinagtratar ako sa kabootan, asin kun sinda naghuhuna sako na mawaraan nin gana na magkaigwa nin dapat na paghihingoha asin madukuton na manera na makapagpabag-o sako---ako lugod pinagbayaanan sa gabos na klase nin mga tentasyon; asin, nakikihalo sa gabos na mga klase nin sosyedad, ako pirmeng nahuhulog pasiring sa kadakol na kalokohang pagkasala, asin ipinagpahiling an kaluyahan nin pagkahoben, asin an mga kaluyahan kan pantawong natura; na, ako naghahagad tawad na masabi, nakapagtulak sako pasiring sa manlaenlaen na mga tentasyon, nakakapagpa-anggot sa paghiling nin Diyos. Sa paghihimo kaining pagkukumpisal, mayo nin saro na kaipuhang maghuna sako na nagkasala sa anuman na darakula o magabaton na mga kasalan. An disposisyon na gumibo kaini mayo man sa sakuyang natura. Pero ako nagkasala sa kakarawan, asin minsan kairiba kan maogmahon na kumpanya, asin iba pa, na bakong konsistido kan sarong karakter na dapat kuta nang pagmantineron nin saro na pinagpangapudan nin Diyos na siring baya sako. Pero ini bako na gayong makangalas sa kiisay man na nakakagiromdom kan sakuyang kahobenan, asin nakasanayan na an sakuyang likas na pagkamaogmahon.
29 Bilang konsekuwensiya kaining mga bagay, ako minsan nakakamate nin kabasulan para sa sakuyang kaluyahan asin bakong mga kaperpektuhan; kunsoarin, na sa kabanggihon kan nasambit sa ibabaw na ikaduwang pulo asin enot kan Septiyembre, matapos na ako magpapahingalo na sa sakuyang higdaan sa banggi, ako nasabngan sa sakuyang sadire na magpangadye asin maghagad sa Makakamhang Diyos para sa kapatawadan kan gabos na sakuyang mga kasalan asin mga kalokohan, asin man para sa sarong manipestasyon sa sako, na ako puwedeng makaaram kan sakuyang estado asin tindog sa atubangan niya; nin huli ta ako igwa nin bilog na tiwala na magkakaigwa nin sarong banal na manipestasyon, siring na ako kaidto nagkaigwa na.
30 Habang ako yaon na sa akto nin pagpangapudan sa Diyos, ako nakadiskubre nin sarong liwanag na nagbabanaag sa laog kan sakuyang kuwarto, na padagos na naglalaad hanggan sa an kuwarto nagin maliwanagon kesa sa kaluntukan nin udto, kunsoarin tulos may sarong persoha na nagpahiling harani sa sakuyang higdaan, nakatindog sa paros, nin huli ta an saiyang mga bitis dae nakatungtong sa salog.
31 Siya may sul-ot nin haluwag na roba na may pinakamadahumon na kaputian. Ini sarong kaputian na sobrahon pa sa anumang makinabanon na bagay na sakuya nang nahiling; ni ako makakapaniwala na an anuman na makinabanon na mga bagay mapuwedeng mahimong mahiling na grabeng gayo an puti asin siraw. An saiyang mga kamot hayag, asin saiyang mga takyag man, sarong kadikit na nakataas sa pulserasan; iyo man, an saiyang mga pamitisan hayag, siring kan saiyang mga bitis, sarong kadikit na nakataas sa mga bukohan. An saiyang payo asin liog hayag man. Sakong nadiskubre na siya mayo nang ibang gubing kundi an saiyang roba, siring na ini bukas, kaya ako nakakahiling kan laog nin saiyang daghan.
32 Bako sana na an saiyang roba grabeng gayo an puti, kundi an bilog niyang persona na yaon sa kamurawayan labaw pa sa deskripsyon, asin an saiyang hitsura tunay na siring sa kilat. An kuwarto yaon sa grabe na gayong liwanag, pero bako man na pinakamasiraw sa siring sa nakalukob kan saiyang persona. Kan ako enot na nakahiling sa saiya, ako natakot; pero an katakutan dae naghaloy nawara sako.
33 Siya nag-apod sako sa pangaran, asin nagsabi sa sako na siya sarong mensahero na ipinadara gikan sa presensiya nin Diyos sako, asin ta an saiyang pangaran Moroni; na an Diyos igwa nin sarong trabaho na sakong gigibohon; asin na an sakuyang pangaran magigin dapat sa karahayan asin sa maraot sa pag-iriba kan gabos na mga nasyon, mga lahi, asin mga dila, o baya ini dapat magigin yaon pareho sa marahay asin maraot na pagsasabihon sa pag-iriba kan gabos na mga katawohan.
34 Siya nagsabi na igwa nin sarong libro na nakadeposito, ipinagsurat sa mga bulawang plake, na nagtatao nin kasaysayan kan mga dating mga paraerok sa kontinenteng ini, asin iyo an paggigikanan na kun saen sinda nagburutwa. Siya man nagsabi na an kabilogan kan daeng katapusan na Ebanghelyo nakapalaman kaini, siring na ipinagtao sa paagi kan Tagapagligtas sa mga suanoy na mga paraerok;
35 Siring man, na igwa nin duwang gapo sa pilak na mga pampana---asin ining mga gapo, nakagakot sa sarong baluti, na minabilog kan pinag-aapod na Urim asin Thummim---na nakadeposito kaiba an mga plake; asin an pagkakapot asin paggagamit kaining mga gapo iyo idtong minabilog “mga tagakita” kan suanoy o nakaaging mga panahon; asin ta an Diyos an nag-andam sainda para sa katuyuhan nin pagsasalin kan libro.
36 Pagkatapos sabihon sako ining mga bagay, siya nagpoon sa pagkotar kan mga propesiya kan Lumang Tipan. Siya enot nagkotar sa parte kan ikatolong tsapter nin Malakias; asin siya nagkotar man sa ikaapat o huring tsapter kan kaparehong propesiya, maski na ngani may kadikit na pagkakaiba gikan sa kun paano ini nababasa sa satuyang mga Bibliya. Embes na ipagkotar an enot na bersikulo siring na ini nababasa sa satuyang mga libro, siya nagkotar kaini:
37 Nin huli ta hilnga, an aldaw maabot na magsusulo siring sa sarong pugon, asin an gabos na mapang-abaw-abaw, iyo, asin an gabos na naggigibo nin karigsokan pagsusuloon na siring sa igatong; nin huli ta sinda na maarabot an magsusulo sainda, nagsabi an Kagurangnan nin mga Hukbo, na ini makakapagtada sainda nin ugat o sanga.
38 Asin giraray, siya nagkotar kan ikalimang bersikulo na: Hilnga, Ako magpapahayag sa saimo kan Pagkasaserdote, sa paagi kan kamot ni Elijah an propeta, bago pa an pag-abot kan dakula asin makangirhat na aldaw nin Kagurangnan.
39 Siya man nagkotar kan sunod na bersikulo na naiiba: Asin saiyang itatanom sa mga puso kan mga kaarakian an mga promisang pinaghimo sa mga ama, asin an mga puso kan mga kaarakian ipagbabaling sa saindang mga ama. Ta kun bako ini, an bilog na kinaban magigin yaon sa tugmad na kasayangan sa saiyang pag-abot.
40 Bilang kadagdagan kaini, siya nagkotar kan ika-sampulo may sarong tsapter kan Isaias, na nagsasabi na ini haranihon na mautob. Siya nagkotar man kan ikatolong tsapter kan Mga Gibo, duwang pulo may duwa asin sa duwang pulo may tolong mga bersikulo, kaparehong gayo kun ano sindang yaon sa Bagong Tipan. Siya nagsabi pa na an propeta iyo si Kristo; pero an aldaw dae pa nag-abot kunsoarin na “sinda na habong magdadangog kan saiyang boses dapat na pagputulon gikan sa pag-iriba nin mga katawohan,” pero madalion mag-abot.
41 Siya man nagkotar kan ikaduwang tsapter kan Joel, gikan sa duwang pulo may walong bersikulo hanggan sa huri. Siya man nagsabi na ini dae pa nauutob, pero madalion nang mangyayari. Asin siya dagos nagtaram na an kabilogan kan mga Hentil madalion nang umabot. Siya nagkotar nin kadakol na iba pang mga linya kan kasuratan, asin ang nagpaliwanag nin kadakol na mga kapaliwanagan na dae puwedeng ipagsambit digde.
42 Giraray, siya nagsabi sako, na kunsoarin na sakong makua na idtong mga plake na saiyang pinagsasabi---nin huli ta an panahon na sinda dapat na makaputan dae pa nauutob---Ako dae dapat na magpapahiling kaini sa arinman na tawo; ni an baluti na igwang Urim asin Thummim; sana sa sainda na ako pinagsugong ipagpahiling sainda; ta kun ginibo ko ako dapat na pagdedestrosohon. Habang siya nakikipag-olay sako manungod sa mga plake, an bisyon pinagbuksan sa sakuyang isip na tangani sakong mahiling an lugar kun saen an mga plake pinagdeposito, asin ta malinawon asin distinktibo na ako makakaaram kan lugar giraray kun mabisita ko ini.
43 Pagkatapos kaining komunikasyon, ako nakahiling sa liwanag sa laog kan kuwarto na nagpoon sa pagtipon tulos sa palibot kan persona niya na nakikipag-olay sako, asin ini nagpadagos-dagos hanggan an kuwarto giraray nawalat na madiklom, laen lang idtong nakapalibot saiya; kunsoarin, tulos ako nakahiling, siring kaidto, nin sarong tubong nagbukas paitaas pasiring sa langit, asin siya nagpasakat hanggan siya bilog nang nawara, asin an kuwarto nawalat na siring kaidto bago pa man na ining langitnong liwanag nahimong naipagpahiling.
44 Ako nakahigdang naogma sa singularidad kan eksena, asin nagngalas nin dakula sa kun ano idtong pinagsabi sako sa paagi kaining ekstraordinaryong mensahero; kunsoarin, sa katahawan nin sakuyang meditasyon, ako tulos na nakadiskubre na an sakuyang kuwarto giraray nagpopoon na magkaigwa nin liwanag, asin sa biglaang pangyayari, siring kaidto, an kaparehong langitnon na mensahero yaon giraray harani sa sakong higdaan.
45 Siya nagpoon, asin giraray pinagsasabi an kapareho na gayong mga bagay na saiyang pinaghimo arog kan enot niyang pagbisita, na mayo na gayong pagkakaiba; na sa pangyayari, siya nagsagi sako kan dakulaon na mga paghuhukom na maarabot sa ibabaw nin kinaban, na igwa nin dakulang kalipungawan sa paagi kan taggutom, espada, asin kapestehan; asin ta ining makurion na mga paghuhukom maabot sa kinaban sa henerasyong ini. Matapos na maipagsabi ining mga bagay, siya giraray nagsakat siring na saiyang pinaggibo kaidto.
46 Sa panahon na ini, grade kararom an mga impresyon na pinaghimo sa sakuyang isip, na an pagturog nawara gikan sa sakuyang mga mata, asin ako nakahigda na nadaog nin kangangalasan sa kun ano baya an sakong parehong nahiling asin nadangog. Pero ano an sakuyang sorpres kan giraray sakong nahiling an parehong mensahero harani sa may higdaan ko, asin nadangog siyang nagsabi o pinag-otro giraray sako an kaparehong mga bagay na siring kaidto; asin nagdagdag nin patanid sako, pinagsasabi sako na si Satanas maprubar sa pagtentar sako (sa konsekuwensiya sa pobreng sirkumstansiya kan pamilya nin sakuyang ama), tanganing kuahon an mga plake para sa katuyuhan na magigin mayaman. Kaini siya nagbawal sako, na nagsasabi na ako kaipong mayo nin ibang obhetibo sa isip na pagkuahon an mga plake kundi para sa pagpamuraway sa Diyos, asin kaipong dae maimpluwensiyahan nin anuman na ibang motibo kesa sa pagtutugdok kan saiyang kahadean; ta kun laen dae ko makukua sinda.
47 Pagkatapos kaining ikatolong bisita, siya giraray nagsakat pasiring sa langit siring kaidto, asin ako giraray nawalat na naghohorop sa kalaenan sa kun ano baya ini sako pa sanang na-eksperiyensiyahan; kunsoarin haros tulos-tulos pagkatapos na an langitnon na mensahero nakasakat na gikan sako sa laog nin ikatolong pagkakataon, an manok nagturaok, asin ako nakanagbo na an aldaw na iyan paabuton na, na kaya an samuyang interbiyu nakapag-okupa kan bilog na banggi.
48 Ako dae nahaloy nagbuhat gikan sa sakuyang higdaan, asin, siring sa dati, nag-asikaso sa mga kaipuhanan na mga trabaho kan aldaw; pero, sa paprubar na pagtrabaho siring kan ibang pagkakataon, ako nakanagbo kan sakuyang kusog na grabe an kawaraan na tanganing nakapagdulot ini sako na dae bilog na makapaghiro. An sakuyang ama, nagtatrabaho na kaiba ko, nadiskubre na may bagay na sala sa sako, asin nagsabi sako na mag-uli na sana sa harong. Ako nagpoon na kan sakuyang intensiyon na magpasiringon pauli sa harong; pero, sa pagprubar na magbalyo sa kudal paluwas sa omahan na kun saen kami dati, an sakuyang kusog bilog na nagpalya sako, asin ako natumbang makaherak sa daga, asin sa laog nin dikit na oras nagin matuninong na mayong pagkamangno kan anuman na mga bagay.
49 An enot na bagay na sakong nagiromdoman iyo an sarong boses na nagtataram sa sako, pinag-apod sako sa pangaran. Ako naghiling paitaas, asin nahiling an kaparehong mensahero na nakatindog sa ibabawan kan sakuyang payo, napalibutan nin liwanag siring kaidto. Siya dangan giraray nagsabi sa sako kan gabos na saiyang ipinagsabi na kan nakaaging banggi, asin nagsugo sako na magpaduman sa sakuyang ama asin sabihan siya kan bisyon asin mga kasugoan na ako an nakaresibe.
50 Ako nagsunod; ako nagbalik sa sakuyang ama sa tanuman, asin pinagsambit an bilog na bagay sa saiya. Siya nagsimbag sako na idto gikan sa Diyos, asin nagsabi sako na magduman asin gibohon siring kan pinagsugo kan mensahero. Ako naghale sa omahan, asin nagduman sa lugar na kun saen an mensahero an nagsabi sako na an mga plake nakadeposito; asin nin huli sa kadistinktibohan kan bisyon na ako nagkaigwa mapapanungod kaini, ako nakaaram sa lugar tulos kan ako nag-abot duman.
51 Konbenyente sa banwa kan Manchester, probinsiya nin Ontario, New York, nagtitindog an sarong burobukid na igwa nin konsiderableng kadakulaan, asin mas halangkawon sa arin man sa kataraid. Sa may parteng sulnupan kaining burobukid, bakong harayo gikan sa may itaas, sa irarom nin sarong gapo na may konsiderable kadakulaan, nakahaya an mga plake, na nakadeposito sa sarong kahon na gapo. Ining gapo mahibugon asin paikot sa katahawan sa may itaas na parte, asin manipison pasiring sa mga gilid, na tangani na an katahawang parte kaini nahihiling sa ibabaw kan daga, pero an gilid sa bilog na palibot natatabunan nin daga.
52 Kan nahale na an daga, ako nagkua nin sarong pansikwat, na sakong pinagsuksok sa irarom kan gilid nin gapo, asin sa kadikit na pagsikwat ini buminuka. Ako naghiling sa laog, asin yaon duman nanggad sakong nahiling an mga plake, an Urim asin Thummim, asin an baluti, siring kan pinagsabi kan mensahero. An kahon na kun saen nakakaag pinagporma kan mga gapong pinatong na pinadukot kan ibang klaseng semento. Sa may irarom kan kahon nakaladlad an duwang gapo na nakakrusis sa kahon, asin sa ibabaw kaining mga gapo nakalatag an mga plake asin iba pang mga bagay na kairiba ninda.
53 Ako naghimong prubaran na pagkuahon sinda paluwas, pero pinagbawal kan mensahero, asin giraray pinagsabihan na an panahon para darahon sinda paluwas dae pa nag-abot, ni ini mangyayari, hanggan sa ikaapat na taon gikan sa panahon na idto; pero siya nagsabi sako na ako dapat na magduman sa lugar na idto eksaktong sa laog nin sarong taon gikan sa panahon na idto, asin ta duman siya makikipaghilingan sako, asin ako dapat magpadagos na gibohon ini hanggan an panahon mag-abot para makua ko na an mga plake.
64 Sabi pa, siring na ako pinagsugo, ako nagduduman kada tapos nin kada taon, asin sa lambang panahon ako nakakanagbo nin pareho man sanang mensahero duman, asin nagreresibe nin mga instruksyon asin intelihensiya gikan saiya sa lambang pag-oorolay niyamo, pinaggagalang kun ano baya sa Kagurangnan an mga gigibohon, asin gurano asin sa anong manera na an saiyang kahadean pagpapangalagaan sa huring mga aldaw.
Si Joseph Smith ikinasal ki Emma Hale---Saiyang naresibe an mga bulawan na mga plake gikan ki Moroni asin nagsalin nin nagkapirang mga karakter---Si Martin Harris ipinagpahiling an mga karakter asin translasyon ki Professor Anthon, na nakapagsabi: “Ako dae makakabasa nin sarong selyadong libro.” (Mga Bersikulo 55-65.)
55 Siring na an pankinabanon mga sirkumstansiya kan sakuyang ama limitadong maray, kami yaon sa irarom nin pangangaipo na magtrabaho kan samuyang mga kamot, naghahanap sa luwas nin pan-aldawang trabaho asin iba pa, siring na kami nakakakua nin oportunidad. Minsan kami yaon sa harong, asin minsan sa harayo, asin sa paagi nin padagos na pagtatrabaho nakakapagkua nin sarong komportableng kasanggayahan.
56 Kan taon 1823 an pamilya kan sakuyang ama inabutan nin sarong dakulang kasakitan sa paagi nin pagkagadan kan sakuyang pinakamatuang tugang na lalake, si Alvin. Kan bulan nin Oktubre, 1825, ako nagtrabaho sa sarong gurang na tawo na an pangaran Josiah Stoal, na nag-eerok sa probinsiya nin Chenango, Estado kan New York. Saiyang nadangog an sarong bagay manungod sa sarong minahan nin pilak na pinagbukasan kan mga Kastila sa Harmony, probinsiya kan Susquehana, Estado kan Pennsylvania; asin duman, dati pa sa sakuyang pagtrabaho saiya, nagkakalot, na tangani baya, kun posible, madiskubre an mina. Pagkatapos na ako nag-estar kaiba niya, saiyang dinara ako, kaiba an iba pang kairiba niya, na magkalot para sa minahan kan pilak, na kun saen ako nagpadagos sa pagtrabaho nin haros sarong bulan, na mayong nangyayari kan samuyang ginigibo, asin sa katapusi ako an nangibabaw sa gurang na tawo na mag-untok na sa pagkalot kaini. Kaya poon kaidto nabantog na an estorya kan sakuyang pagigin sarong parakalot-kuwarta.
57 Kan panahon na idto na ako nagin empleyado, ako naipamugtak na makaiba an sarong Mr. Isaac Hale, kan lugar na idto; iyo ini duman na sakong nahiling an sakuyang esposa (saiyang akeng babaye), si Emma Hale. Kan ika-18 nin Enero, 1827, kami ikinasal, habang ako empleyado pang yaon sa serbisyo ki Mr. Stoal.
58 Nin huli sa sakuyang padagos na pagsasabi na ako nakahiling nin sarong bisyon, an persekusyon pirmeng nakasunod sako, asin an pamilya kan ama nin sakuyang agom grabeng gayo an pagkontra sa samuyang pagka-aragoman. Ako, kun kaya, yaon sa irarom nin pangangaipo na darahon siya sa ibang lugar; kaya kami nagdulag asin ikinasal sa harong sa Squire Tarbill, sa South Bainbridge, probinsiya nin Chenango, New York. Tulos pagkatapos kan samuyang kasal, ako nagbaya ki Mr. Stoal, asin nagbalik sa sakuyang ama, asin nag-oma kaiba niya kan panahon na idto.
59 Sa kahaluyan an panahon nag-abot na para kuahon an mga plake, an Urim asin Thummim, asin an baluti. Kan ikaduwang pulo may duwang aldaw kan Septiyembre, sanribo walong gatos asin duwang pulo may pito, habang nagduman siring sa pirme na sa kada tapos nin ibang taon sa lugar na kun saen sinda pinagdeposito, an parehong langitnon na mensahero ipinagtao sinda sako na may arog kaining tugon: na ako dapat na magigin responsable para sainda; na kun ako magpawara na mayong pag-iingat, o sa paagi nin anuman na kapabayaan sa parte ko, ako dapat na pagpuputulon; pero kun ako gumamit kan gabos kong paghingoha tanganing preserbaron sinda, sagkod na siya, an mensahero, mangapudan para kuahon sinda, an mga ini dapat na protektahan.
60 Ako sa nahaloy nanagboan an rason kun tadaw ta ako nakaresibe kan arog kaini ka-estriktong tugon tanganing tagoon ining ligtas, asin kun tadaw baya kaini na an mensahero nagsabi na kunsoarin na nagibo ko na kun ano an pinaghahagad sa sakuyang kamot, siya mangangapudan sa pagkua sainda. Nin huli ta sa dae nahaloy na ini nabantog na nakua ko na sinda, na an pinakamatindihong paghingoha an ginamit tanganing makua sinda gikan sako. Lambang estratehiya na naimbento an pinaggibo para lang sa katuyuhan na ini. An persekusyon nagin mas mapaiton asin makuri kesa kaidto, asin kadakulon na tawo an alertado tanganing maagaw sinda gikan sako kun posible. Pero sa paagi nin kadunungan nin Diyos, sinda yaon pa man na ligtas sa sakuyang mga kamot, hanggan na ako nakapaggibo na sa paagi ninda kun ano an pinaghahagad sa sakuyang kamot. Kunsoarin, uyon sa mga kapaagihan, an mensahero nag-apod para kuahon sinda, sakong pinagtao sinda saiya; asin siya kapot sinda sa saiyang pag-ingat sagkod sa aldaw na ini, na iyo an ikaduwang aldaw nin Mayo, sanribo walong gatos asin tolong pulo may walo.
61 An kasibutan, kaya lang, pirmehan nagpadagos, asin an huringhuding kan saiyang rinibong dila yaon sa gabos na panahon pinaggigibo an pagpapaikot kan mga kapalsuhan manunungod sa pamilya nin sakuyang ama, asin manunungod sa sakong sadire. Kun ako tugutan na magsabi nin sanribong parte ninda, ini makakapano nin mga bolyum. An persekusyon, kaya lang, nagin grabeng gayo kakuniot na tanganing ako yaon sa pangangaipong maghale sa Manchester, asin magpaduman kaiba an sakuyang agom pasiring sa probinsiya nin Susquehana, sa Estado kan Pennsylvania. Habang nag-aandam sa pagpoon---bilang pobrehon na maray, asn an persekusyon nagin magabaton sa samuya na dae magkakaigwa nin probabilidad na kami magigin yaon sa iba---sa katahawan nin samuyang mga kasakitan kami nakanagbo nin sarong amigo na sarong lalake sa pangaran na Martin Harris, na uminabot samuya asin nagtao nin limampulong dolyares tanganing tabangan kami sa samuyang pagbibiyahe. Si Mr. Harris sarong residente kan banwa nin Palmyra, probinsiya nin Wayne, sa Estado nin New York, asin sarong paraoma nin may kagalangan.
62 Sa paagi kaining napanahon na tabang ako nakapaggibong makaabot sa lugar nin sakuyang destinasyon sa Pennsylvania; asin tulos pagkatapos kan samuyang pag-abot duman ako nagpoon na kopyahon an mga karakter kan mga plake. Ako nagkopya nin sarong konsiderableng numero ninda, asin sa paagi kan Urim asin Thummim ako nagsalin nin nagkapira sainda, na sakong ginibo sa tahaw kan panahon na ako nag-abot sa harong kan ama nin sakuyang agom, kan bulan na Disyembre, asin kan Pebrerong nagsurunod.
63 Sa panahon kan bulan nin Pebrero, an sinambit na Mr. Martin Harris nakaabot sa samuyang lugar, kinua an mga karakter na sakong pinagkurit gikan sa mga plake, asin nagpoon kaiba ninda na magpasiring sa siyudad nin New York. Nin huli ta kun ako an nangyari na may relasyon saiya asin kan mga karakter, ako minapanungod kan saiyang sadireng kasaysayan kan mga sirkumstansiya, habang saiyang pinagsasabi sinda sako pagkatapos kan saiyang pagbalik, na iyo ngani an mga minasunod:
64 “Ako nagduman sa siyudad nin New York, asin pinagpresentar an mga karakter na pinagsalin, kaiba an translasyon kaini, ki Professor Charles Anthon, sarong selebradong tawo kan saiyang literaryong naginibohan. Si Professor Anthon nagsabi na an translasyon tama, mas lalo na kesa sa iba na saiya nang nahiling na translado gikan sa Ehipsiyano. Ako dangan nagpahiling saiya kaidtong iba na dae pa translado, asin siya nagsabi na sinda Ehipsiyano, Caldiko, Aseriyako, asin Arabiko; asin siya nagsabi na sinda mga tunay na mga karakter. Siya nagtao sako nin sarong sertipiko, minapatotoo sa mga katawohan nin Palmyra na sinda mga tunay na mga karakter, asin ta an translasyon kaini sainda siring na ini translado na ini man tama. Sakong kinua an sertipiko asin ibinugtak sa laog kan sakuyang bulsa, asin pahumalion na sa harong, kunsoaring si Mr. Anthon inapod akong pabalik, asin naghapot sako kun paano na an hoben na lalake nakaaram na igwa nin mga bulawan na plake sa lugar kun saen niya nanagboan sinda. Ako nagsimbag na sarong anghel nin Diyos an nagpahayag kaini saiya.
65 “Siya dangan nagsabi sako, ‘Hilingon ko daw iyang sertipiko.’ Ako uyon na kinua ini paluwas sa sakuyang bulsa asin ipinagtao ini saiya, kan saiyang nakua ini asin ini ginisi sa mga pedaso, na nagsasabi na mayo na nin siring kaining bagay ngonyan na arog sa pagmiministeryo nin mga anghel, asin na kun sakong madadara an mga plake saiya siya an magsasalin sainda. Ako nagsabi saiya na parte kan mga plake selyado, asin ta ako pinagbawalan na darahon sinda. Siya nagsimbag, ‘Ako dae makakabasa nin sarong selyadong libro.’ Sakong binayaan siya asin nagduman ki Dr. Mitchell, na nagsanksyon sa kun ano an pinagsabi ni Professor Anthon manunungod sa parehong mga karakter asin translasyon.”
Si Oliver Cowdery nagsirbe bilang eskriba sa pagsasalin kan Libro ni Mormon---Si Joseph asin si Oliver nagresibe nin Aaronikong Pagkasaserdote gikan ki Juan Bautista---Sinda pinagbunyagan, pinag-ordinahan, asin nagresibe kan espiritu nin propesiya. (Mga Bersikulo 66-75.)
66 Kan ika-limang aldaw nin Abril, 1829, si Oliver Cowdery nag-abot sa sakuyang harong, sagkod kan panahon na idto dae ko pa siya nahiling. Siya nagsabi sako na habang nagtutukdo sa eskuwelahan na yaon sa kataraid na kun saen an sakuyang ama naka-estar, asin an sakuyang ama bilang saro sainda na pinadara sa eskuwelahan, siya nakidagos para sa sarong panahon sa saiyang harong, asin habang yaon duman an pamilya nagsabi saiya kan mga sirkumstansiya kan sakuyang pagresibe kan mga plake, asin sabi ba siya nagduman tanganing himoon na ipaghapot sako.
67 Duwang aldaw na naglipas sa pag-abot ni Mr. Cowdery (na iyo ngani an ika-7 nin Abril) Ako nagpoon sa pagsalin kan Libro ni Mormon, asin siya nagpoon sa pagsurat para sako.
68 Kami padagos pirme sa trabaho nin translasyon, kunsoarin, sa minasunod na bulan (Mayo, 1829), kami kan sa sarong siyertong aldaw nagpaduman sa laog nin mga kakahuyan tanganing magpangadye asin maghapot sa Kagurangnan an mapanungod sa pagbubunyag para sa kapatawadan nin mga kasalan, na samuyang nanagboan pinagsambit sa translasyon kan mga plake. Habang kami yaon sa trabaho, nin pangangadye asin pangangapudan sa Kagurangnan, sarong mensahero gikan sa langit an nagbaba na yaon sa sarong panginuron nin liwanag, asin pinagpatong an saiyang mga kamot samuya, saiyang pinag-ordinahan kami, na nagsasabi:
69 Sa mga payo nindo sakuyang kapwa na mga surugoon, sa pangaran kan Mesiyas, ako minagawad kaining pagkasaserdote ni Aaron, na nagkakapot nin mga susi kan pagmiministeryo nin mga anghel, asin kan ebanghelyo nin pagsosolsol, asin kan pabubunyag sa paagi nin paglubog para sa kapatawaran nin mga kasalan; asin ini dae na pagkukuahon giraray gikan sa kinaban hanggan sa an mga akeng lalake ni Levi gumibo nin dulot giraray nin sarong pagdudulot para sa Kagurangnan nin pagkamatanos.
70 Siya nagsabi na ining Aaronikong Pagkasaserdote mayo nin kapangyarihan sa pagpapatong nin mga kamot para sa regalo kan Espiritu Santo, kundi ini dapat na ipaggagawad sa samuya sa kahaloy-haloyi; asin siya nagsugo samuya na magduman asin magpabunyag, asin itinao samuya an mga direksyon na ako an dapat na magbunyag ki Oliver Cowdery, asin masunod siya an dapat na magbunyag sako.
71 May pag-uyon kami nagduman asin nagpabunyag. Ako an nagbunyag saiya enot, asin pagkasunod siya an nagbunyag sako---pagkatapos ako nagpatong nin sakuyang mga kamot sa saiyang payo asin pinag-ordinahan siya sa Aaronikong Pagkasaserdote, asin pagkasunod siya nagpatong kan saiyang mga kamot sako asin nag-ordina sako sa kaparehong Pagkasaserdote---nin huli ta kami baya pinagsugo.
72 An mensahero na nagbisita samuya sa okasyon na ini asin an naggawad kaining Pagkasaserdote sa samuya, nagsabi na an saiyang pangaran Juan, pareho kaidtong pinag-apod na Juan Bautista sa Bagong Tipan, asin ta siya naggibo sa irarom kan direksyon ninda Pedro, Santiago asin Juan, na nagkakapot kan mga susi nin Pagkasaserdoteng Melchizedek, na an Pagkasaserdoteng ini, siya nagsabi, sa tinakdang panahon ipaggagawad sa samuya, asin ta ako dapat na pag-aapudon an enot na Elder kan Simbahan, asin siya (Oliver Cowdery) an ikaduwa. Ini nangyaring kan ikalimang pulo may limang aldaw kan Mayo 1929, na kami pinag-ordinahan sa irarom kan kamot kaining mensahero, asin pinagbunyagan.
73 Tulos sa samuyang pagluwas gikan sa tubig matapos na kami pinagbunyagan, kami nakapag-eksperiyensiya nin dakula asin mamurawayon na mga bendisyon gikan sa satuyang Langitnon na Ama. Dae na naghaloy na ako nagbunyag ki Oliver Cowdery, na an Espiritu Santo naglukob saiya, asin siya nagtindog asin nagpropesiya nin kadakol na mga bagay na sa dae mahaloy mangyayari. Asin giraray, hidalion siring na ako pinagbunyagan niya, ako man nagkaigwa nin espiritu nin propesiya, kunsoarin, habang nakatindog, ako nagpropesiya manunungod sa pagtindog kaining Simbahan, asin kadakol pang ibang mga bagay na konektado sa Simbahan, asin kaining henerasyon nin mga kaarakian nin mga tawo. Kami napuspos kan Espiritu Santo, asin nagmuraway sa Diyos sa samuyang kaligtasan.
74 An samuyang mga isip bilang ngonyan nagkariliwanagan, kami nagpoon na magkaigwa nin mga kasuratan na bukas na pinaglatag sa samuyang mga pagkasabot, asin an tunay na kahulugan asin intensiyon kan saindang mas kamisteryosong mga linya ipinagpahayag samuya sa sarong manera na kami dae makapagsabot kaidto, ni maski kaidto pa nakapag-isip kaini. Sa ngonyang panahon kami mapursige na itago an sikreto kan mga sirkumstansiya na naresibe an Pagkasaserdote asin kan samuyang pagkabunyag, nin huli sa sarong espiritu nin persekusyon na nagpopoon nang gayo nagmamatean ini sa mga kataraid.
75 Kami pinagpatakot na durumugon, sa pana-panahon, asin ini, man, sa paagi kan mga paratukdo nin relihiyon. Asin an saindang mga intensiyon sa pagdumog samuya napugulan sana nin huli sa maimpluwensiyang pamilya kan ama nin sakuyang agom (sa irarom kan Banal na katabangan), na nagin mainamigong maray sako, asin kontrahon sa mga mandurumog, asin bulanos na minatugot na ako dapat na tugutan na magpadagos sa trabaho nin pagsasalin na mayong kaabalahan; asin kun kaya nagdulot asin nagpromisa samuya nin proteksyon gikan sa gabos na lampaw sa batas na mga kapaagihan, sa abot kan saindang kakayahan.
1 Si Oliver Cowdery nagladawan kaining mga pangyayari sa arog kaini: “Iyo ini ang mga aldaw na dae dapat paglilingawan---na magtukaw na yaon sa irarom kan tingog nin arong boses na nagdidikta sa paagi kan inspirasyon nin langit, namuklat sa pinakahalangkaw na pasasalamat kan kairaroman kaini! Aro-aldaw ako nagpadagos, daeng abala, sa pagsurat gikan sa saiyang nguso, habang saiyang pinagsasalin kaiba kan Urim asin Thummim, o, siring sa mga Nephita na nakapagsabi, “Mga Interpretador,” an historiya o rekord na pinag-apod na ‘An Libro ni Mormon.’
2 “Sa pagnotisya, sa tamang dikit na tataramon, an mainteresadong kasaysayan na ipinagtao ni Mormon asin kan saiyang matapat na akeng lalake, si Moroni, kan sarong mga katawohan na kaidto minsan kinamutan asin pinaboran nin langit, makakasobra sa sakuyang presenteng desinyo; kun kaya dae ko nguna ipinagdagos hanggan sa ibang panahon, asin, siring sa sinabi ko sa introduksyon, mas direktang pagtukaron an nagkapirang mga insidente tulos na konektado sa pagtindog kaining Simbahan, na puwede magin makapa-ogma sa nagkapirang ribo na nagdurulok, sa tahaw nin mga pag-ismid nin mga halipot-isip asin mga pagpakaraot kan mga hipokrito, asin nagkugos sa Ebanghelyo ni Kristo.
3 “Mayong mga tawo, sa saindang banayad na kaisipan, an makapagsalin asin makapagsurat sa mga direksyon na ipinagtao sa mga Nephita gikan sa nguso nin Tagapagligtas, kan eksaktong manera na kun saen an mga tawo dapat na ipagtugdok an Saiyang Simbahan, asin lalo na kunsoarin na an korapsyon naglakop na sa daeng padumanan sa gabos na mga porma asin sistema na pinag-uugali sa pag-iriba nin mga tawo, na dae nagmamawot kan sarong pribilihiyo nin pagpapahiling nin kabulanosan nin puso sa paagi nin paglulubog sa likidong lubungan, tanganing manimbagan na may sarong ‘marahayon na konsensiya sa paagi kan pagkabuhay-liwat ni Jesukristo.’
4 “Matapos na suraton an kasaysayan na ipinagtao manungod sa ministeryo kan Tagapagligtas para sa mga katadaan kan banhi ni Jacob, na yaon sa kontinenteng ini, ini pasilon na mahihiling, siring na an propeta an nagsabi na iyo ini, na an kadikloman naglakop sa kinaban asin grabeng gayo an kadikloman an yaon sa mga kaisipan nin mga katawohan. Sa dagos na pag-atid-atid ini pasilon na paghihilingon na sa tahaw nin dakulang iriwalan asin kariribokan manunungod sa relihiyon, mayong nagkaigwa nin awtoridad gikan sa Diyos tanganing pagpapamahalaan an mga ordinansa kan Ebanghelyo. Nin huli ta an sarong kahaputan puwedeng ipaghapot, igwa daw nin awtoridad an mga tawo tanganing magpamahala sa pangaran ni Kristo, na nagsisikwal nin mga kapahayagan, kunsoarin na an Saiyang testimonya iyo an bakong hababaon kesa espiritu nin propesiya, asin an Saiyang relihiyon nakatugmad, nakatindog, asin sustinido sa paagi nin tulos-tulos na mga kapahayagan, sa bilog na kapanahunan nin mundo kunsoarin na Siya nagkaigwa nin mga katawohan sa kinaban? Kun ining mga pangyayari ipinaglubong, asin maingat na pinagtatago nin mga tawo na an kahusayan magigin yaon sa kadelikaduhan kun an saro magkapermiso na magsirang sa mga lalawgon nin mga tawo, sinda bako nang gayo para satuya; asin kami sana naghahalat para sa kasugoan na ipagtatao na ‘Tindog asin magpabunyag.’
5 “Ini bakong haloy na pinagmawot bago pa ini nagkatotoo. An Kagurangnan, na mayaman sa pagkaherak, asin danay na bulanos sa pagsisimbag sa konsistidong pangadyeon nin mga mapagpakumbaba, matapos na kita mag-apod sa Saiya sa sarong maigot na manera, laen pa sa kairibahan nin mga tawo, nagbaba tanganing maipahiling satuya an Saiyang kagustuhan. Kan bigla sana, siring sa gikan sa katahawan nin eternidad, an boses nin Paratubos nagtaram nin katuninongan sa samuya, habang an belo pinaghawi asin an anghel nin Diyos nagbaba na nagugubingan nin kamurawayan, asin nagbariwas kan haditong pinaghahanap na mensahe, asin nin mga susi kan Ebanghelyo nin pagsosolsol. Ano baya an kaogmahan! Ano baya an kasalinggayahan! Ano baya an kangangalasan! Habang an mundo pinagduduyan asin pinagtatanyog---habang milyones an nagkakapa-kapa siring sa bulag na yaon sa muralyo, asin habang an gabos na mga tawo nagtitiwala sa daeng padudumanan, bilang sarong heneral na masa, an samuyang mga mata nakahiling, an samuyang mga talenga nakadangog, na siring sa ‘banaag nin aldaw’; iyo, mas sobra pa---sa labaw kan kislap kan banaag nin saldang sa bulan nin Mayo, na kun saen nagpalindong kan saiyang siraw sa ibabaw kan lalawgon nin kalikasan! Dangan an saiyang boses, maski na ngani malumanay, nagtusok sa sentro,asin an saiyang mga tataramon, ‘Ako na saindong kapwa-surugoon,’ nagpara sa lambang takot. Kami nagdangog, kami nagmansay, kami nag-omaw! Idto boses nin sarong anghel gikan sa kamurawayan, idto sarong mensahe gikan sa Pinaka Halangkaw! Asin habang kami nagdadangog kami nagkaorogma, habang an Saiyang pagkamoot nagpukaw kan samuyang mga kalag, asin kami napatos sa bisyon kan Makakamhan! Haen baya an kuwarto para sa pagdududa? Mayo ngani; an daeng padumanan nagdulag, an duda naglubog tanganing dae na magbutwa, habang kathang-isip asin pagdadaya nagdulag na sa daeng kasagkoran!
6 “Pero, namumutan na tugang, isipa, lawig na isipa para sa sarong momento, anong kaogmahan an nagpano sa samuyang mga puso, asin sa ano bayang sorpresa na kami nakapagduko, (nin huli ta siisay baya an dae makapagduko sa pagluhod para kaining sarong bendisyon?) kunsoarin na kami nagresibe sa irarom kan saiyang kamot an Banal na Pagkasaserdote siring sa saiyang sinabi, ‘Sa mga payo nindo sakuyang kapwa na mga surugoon, sa pangaran kan Mesiyas, ako minagawad kaining pagkasaserdote asin kaining awtoridad, na magigin yaon sa ibabaw nin kinaban, an an mga Akeng lalake ni Levi mapuwedeng magdulot nin sarong pagdudulot para sa Kagurangnan nin pagkamatanos!’
7 “Ako dae magpuprubar na ipagpinta saimo an mga kamatean kaining puso, ni an mahistikong kagayunan asin kamurawayan na nagsalikop samuya sa okasyon na ini; pero ika magtutubod sako kun ako magsasabi, na an kinaban, nin an mga tawo, na igwa nin elokuwensiya nin panahon, dae makakapoon na gubingan an lengguwahe na siring sa interes asin kabanalan sa sarong manera na siring kaining banal na personahe. Dae; ni igwa ining kinaban nin kapangyarihan sa pagtao nin kasalinggayahan, sa pagputong nin katuninongan, o makasabot sa kadunungan na nakapalaman sa lambang sinabi siring na sinda pinagbariwas sa paagi nin kapangyarihan kan Espiritu Santo! An tawo puwedeng makadaya kan saiyang mga kapwa-tawo, an kadayaan puwedeng sundan nin kadayaan, asin an mga kaarakian nin mga maririgsok na iba puwedeng magkaigwa nin kapangyarihan tanganing akiton an mga manloloko asin dae natukdoan, sagkod na mayo kundi kathang-isip an ipinag-ambag sa kadakol, asin an prutas nin kapalsuhan an nagdadara kaini sa ngonyan kan kapirotan pasiring sa lubungan; pero sarong pagdoot kan muro nin saiyang pagkamoot, iyo, sarong bangraw nin kamurawayan gikan sa itaas na mundo, o sarong tataramon na gikan sa nguso nin Tagapagligtas, gikan sa kairaroman nin eternidad, nagtama kaini gabos pasiring sa daeng kamanungdanan, asin nagpura kaini sagkod pa man gikan sa isip. An kasegurohan na kami yaon sa presensiya nin sarong anghel, an kasiyertuhan na kami nakadangog kan boses ni Jesus, asin an katotoohan na mayong kuri habang ini nagdadalayday gikan sa sarong dalisay na personahe, pinagdikta sa paagi nin kagustuhan nin Diyos, iyo sako nakaaging paglaladawan, asin ako danay na maghahanap kaining pahayag kan karahayan nin Tagapagligtas na may pagngalas asin pasasalamat habang ako tinutugutan pang magpawalat; asin sa mga mansiyon na idto na kun saen an perpeksyon naka-erok asin an kasalan dae makakaabot, ako naglalaom nin pag-omaw sa aldaw na iyan na dae na nanggad mag-uuntok.”---Messenger and Advocate, vol. 1 (Oktubre 1834), pp. 14-16.
