Friday, January 1, 2010

Tsapter 5

An mga Diyos pinagtapos ninda an pagpaplano kan paglalang nin gabos na mga bagay---Saindang pinapangyari na paglalang na uyon sa saindang mga plano---Si Adan an nagpangaran sa lambang buhay na linalang.

1 ASIN kaya satuyang tatapuson an mga langit asin an kinaban, asin gabos na mga hukbo ninda.

2 Asin an mga Diyos nagsabi sa pag-iriba kan saindang mga sadire: Sa ikapitong panahon satuyang uuntukon an satuyang trabaho, na satuyang pinagka-orolayon; asin kita magpapahingalo sa ikapitong panahon gikan sa gabos niyatong trabaho na satuyang pinagka-orolayan.

3 Asin an mga Diyos pinaghaman sa ikapitong panahon, nin huli ta sa ikapitong panahon sinda magpapahingalo gikan sa gabos nindang mga ginigibo na sainda (an mga Diyos) nang pinagka-orolayan sa pag-iriba kan saindang mga sadire na pagpormahon; asin pinagpabanal ini. Asin kaya iyo ini an saindang desisyon sa panahon na iyan na sinda nagka-orolay sa pag-iriba kan saindang mga sadire tanganing pormahon an mga langit asin an kinaban.

4 Asin an mga Diyos nagbaraba asin nagporma kaining mga henerasyon nin mga langit asin nin kinaban, kunsoarin na sinda nagporma sa aldaw na an mga Diyos nagporma nin kinaban asin mga kalangitan.

5 Na uyon sa gabos na bagay na saindang pinagsabi mapanungod sa lambang tanom nin kadagaan bago pa man ini yaon sa kinaban, asin lambang herbo nin kadagaan bago pa man ini nagtalubo; nin huli ta an mga Diyos dae nagkausa kaini na mag-uran sa ibabaw nin daga kunsoarin na sinda nagka-orolay sa gibohon ninda, asin dae pa nagporma nin sarong tawo na magbubungkal kan daga.

6 Pero nagkaigwa sa itaas nin sarong palumpon nin kabasaan na gikan sa kinaban, asin an nagtubig sa bilog na lalawgon nin daga.

7 Asin an mga Diyos nagporma nin tawo gikan sa alpog nin daga, asin nagkua nin saiyang espiritu (iyo ngani, an espiritu nin tawo), asin pinagbugtak ini sa laog niya; asin pinaghangusan sa saiyang dungo kan hinangos nin buhay, asin tawo nagin sarong buhay na kalag.

8 Asin an mga Diyos nagtanom nin sarong hardin, sa sirangang parte nin Eden, asin duman saindang binugtak an tawo, na an espiritu na saindang pinagbugtak sa laog nin hawak na saindang pinagporma.

9 Asin gikan sa daga naghimo an mga Diyos na magpatalubo nin lambang kahoy na madahumon sa paghiling asin marahayon para sa pagkakan; asin kahoy in buhay, man, na yaon sa katahawan nin hardin, asin an kahoy nin kaaraman nin marahay asin maraot.

10 Igwas nin sarong salog nagdadalayday paluwas nin Eden, tanganing tubigan an hardin, asin gikan duman ini nagkabaranga asin nagin apat an pamayuhan.

11 Asin an mga Diyos pinagkua an tawo asin ibinugtak siya sa Hardin nin Eden, tanganing pakarhayon ini asin pangalagaan ini.

12 Asin an mga Diyos nagsugo sa tawo, na nagsasabi: Sa lambang kahoy sa hardin saimo puwedeng pagkakanon na libre,

13 Pero sa kahoy nin kaaraman nin marahay asin maraot, ika dae magkakakan kaini; nin huli ta sa panahon na ika magkakan kaini, ika seguradong magagadan. Ngonyan ako, si Abraham, nahiling na ini yaon sa panahon nin Kagurangnan, na susog sa panahon nin Kolob; nin huli ta siring baya na an mga Diyos dae pa pinagtalaga ki Adan an saiyang kaisipan.

14 Asin an mga Diyos nagsabi: Tuguti na maghimo kita nin sarong paratabang para sa tawo, nin huli ta ini bakong marahayon na an tawo dapat magin solo, kun kya kita magpoporma nin sarong paratabang para saiya.

15 Asin an mga Dyos nagkausa nin sarong nanok na pagturog an maghulog ki Adan; asin siya nagturog, asin sinda nagkua nin saro kan saiyang mga gusok, asin pinagsarhan nin laman bilang karibay kaini;

16 Asin sa gusok na an mga Diyos an nagkua gikan sa tawo, nagporma sinda nin sarong babaye, asin pinagdara siya sa atubangan nin tawo.

17 Asin si Adan nagsabi: Iyo ini kaidto an tul-ang nin sakuyang mga tul-ang, asin laman nin sakuyang laman; ngonyan siya pag-aapudon na Babaye, nin huli ta siya pinagkua gikan sa tawo;

18 Kun kaya an sarong lalake mahale sa saiyang ama asin sa saiyang ina, asin makiki-ibahan sa saiyang esposa, asin sinda magigin sarong laman.

19 Asin sinda parehong huba, an lalake asin an saiyang esposa, asin dae nasusupog.

20 Asin gikan sa daga an mga Diyos nagporman kan lambang hayop nin kadagaan, asin nin lambang gamgam nin paros, asin pinagdara sinda sa atubangan ni Adan tanganing hilingon kun ano an saiyang ipag-aapod sainda; asin kun anuman an pinag-aapod ni Adan sa lambang buhay na linalang, na iyo na an dapat nakapangaranan kaini.

21 Asin si Adan nagtao nin mga pangaran sa gabos na kabakahan, sa mga gamgam nin paros, sa lambang hayop nin kadagaan; asin para ki Adan, nagkaigwang nanagboan an sarong paratabang para saiya.

SARONG KAKOPYAHAN GIKAN SA LIBRO NI ABRAHAM

Numero 1

clip_image002

KAPALIWANAGAN

1 Pig. 1. An Anghel nin Kagurangnan

2 Pig. 2. Si Abraham ginapos sa ibabaw nin altar.

3 Pig. 3. An idolatrosong pade nin Elkenah pinag-ambahan na ipagdulot si Abraham bilang sarong sakripisyo.

4 Pig. 4 An altar para sa sakripisyo kan idolatrosong mga pade, nagtitindog sa atubangan kan mga diyos nin Elkenah, Libnah, Mahmackrah, Korash, asin Paraon.

5 Pig. 5. An idolatrosong diyos nin Elkenah.

6 Pig. 6. An idolatrosong diyos nin Libnah.

7 Pig. 7. An idolatrosong diyos nin Mahmackrah.

8 Pig. 8. An idolatrosong diyos nin Korash.

9 Pig. 9. An idolatrosong diyos nin Paraon.

10 Pig. 10. Si Abraham sa Ehipto.

11 Pig. 11. Pinagdesinyo na minarepresenta kan mga harigi nin langit, siring sa pagkasabot kan mga Ehipsiyano.

12 Pig. 12. Raukeeyang, minakahulugan nin kahiwasan, o an pirmamento sa ibabaw nin satuyang mga payo; pero sa laog kaining mga kalangitan, nagsisimbag sa Hebreong tataramon, Shaumahyeem.

SARONG KAKOPYAHAN GIKAN SA LIBRO NI ABRAHAM

Numero 2

clip_image004

KAPALIWANAGAN

1 Pig. 1. An Kolob, minapasabot sa enot na paglalang, haranihon sa selestiyal, o an erokan nin Diyos. Enot sa gobyerno, an huri na minapanungod sa kasukolan nin panahon. An kasukolan na uyon sa selestiyal na panahon, na selestiyal na panahon minakahulugan na sarong aldaw nin sarong kubito. An sarong aldaw sa Kolob iyo an kapantay nin sanribong taon na uyon sa kasukolan kaining kinaban, na pinag-apod kan mga Ehipsiyano na Jah-oh-eh.

2 Pig. 2. Nakatindog kasunod sa Kolob, na pinag-apod kan mga Ehipsiyano na Oliblish, na iyo an kasunod na dakulang tagapagpamahalang linalang na harani sa selestiyal o an lugar kun saen an Diyos nag-eerok; nagkakapot kan susi nin kapangyarihan man, mapapanungod sa ibang mga planeta; siring ipinagpahayag nin Diyos ki Abraham, habang siya nagdudulot nin sakripisyo sa ibabaw nin sarong altar, na saiyang pinagtugdok para sa Kagurangnan.

3 Pig. 3. Pinaghimong tanganing irepresenta an Diyos, nagtutukaw sa saiyang trono, nagubingan nin kapangyarihan asin awtoridad; na igwa nin sarong korona nin eternal na liwanag sa ibabaw kan saiyang payo; minarepresenta man kan dakulaon na Panusing-tataramon kan Banal na Pagkasaserdote, siring sa ipinagpahayag ki Adan sa Hardin nin Eden, siring man ki Seth, Noah, Melchizedek, Abraham, asin sa gabos na an Pagkasaserdote ipinagpahayag.

4 Pig. 4. Kasimbagan sa Hebreong tataramon na Raukeeyang, na minakahulugan na kahiwasan, o an pirmamento nin mga kalangitan; siring man sarong pambilang na pigura, sa Ehipsiyano na minakahulugan na sanribo; naninimbagay sa kasukolan nin panahon nin Oliblish, na kapantay nin Kolob sa pag-inog kaini asin sa pagsusukol nin panahon kaini.

5 Pib. 5. Ini pinag-apod sa Ehipsiyano na Enish-go-on-dosh; iyo ini an saro sa mga namamahalang mga planeta man, asin ini pinagsasabi kan mga Ehipsiyano na iyo an Saldang, asin nagsusubli kan saiyang liwanag gikan sa Kolob sa paagi kan medyum na Kae-e-yanrash, na iyo an pinakagrandeng Susi, o, sa ibang mga tataramon, an nagpapamahalang kapangyarihan, na nagpapamahala nin limang pulo may lima na ibang pinagtakdang mga planeta o mga bitoon, na siring man kan Floeese o an Bulan, an Kinaban asin an Saldang sa saindang pantaonan na mga pag-inog. An planetang ini nagreresibe kan saiyang kapangyarihan sa paagi kan medyum na Kli-flos-is-es, o Hah-ko-kau-beam, an mga bitoon na pinagrepresentar sa paagi kan mga numerong 22 asin 23, nagreresibe nin liwanag gikan sa mga pag-inog nin Kolob.

6 Pig. 6. Minarepresentar kaining kinaban sa kan saiyang apat na mga rona.

7 Pig. 7. Minarepresentar sa Diyos na nakatukaw sa saiyang trono, ipinagpapahayag sa paagi nin mga kalangitan an pinakagrandeng mga Panusing-tataramon kan Pagkasaserdote; siring man, an senyal kan Espiritu Santo ki Abraham, sa porma nin sarong kalapati.

8 Pig. 8. Naglalaman nin mga kasuratan na dae maipagpapahayag sa kinaban; pero ini makakamit sa laog kan Banal na Templo nin Diyos.

9 Pig. 9. Dae dapat nguna maipagpapahayag sa presenteng panahon.

10 Pig. 10. Pareho man.

11 Pig. 11. Pareho man. Kun an mundo makanagbo kaining mga numero, kaya tuguti ining mangyari. Amen.

12 Mga pigurang 12, 13, 14, 15, 16, 17, 18, 19, 20, asin 21, ipagtatao sa sadireng panahon nin Kagurangnan.

13 An sa ibabaw na translasyon ipinagtao habang kami igwa nin anuman na karapatan na ipagtao sa presenteng panahon.

SARONG KAKOPYAHAN GIKAN SA LIBRO NI ABRAHAM

Numero 3

clip_image006

KAPALIWANAGAN

1 Pig. 1. Si Abraham nakatukaw sa trono nin Paraon, sa paagi kan kagalangan kan hade, na igwa nin sarong korona sa ibabaw kan saiyang payo, minarepresentar kan Pagkasaserdote, bilang pinanungdanan kan grandeng Panguluhan sa Langit; igwa nin baston nin hustisya asin kahukuman sa saiyang kamot.

2 Pig. 2. Hadeng Paraon, na an pangaran ipinagtao kan mga karakter na yaon sa ibabaw kan saiyang payo.

3 Pig. 3. Minakahulugan ki Abraham sa Ehipto siring sa ipinagtao na Pigura 10 kan Kakopyahan No. 1.

4 Pig. 4. Prinsipe kan Paraon, Hade kan Ehipto, siring sa ipinagsurat sa ibabaw kan kamot.

5 Pig. 5. Shulem, saro sa mga prinsipal na tagapagsirbe kan hade, siring ipinagrepresentar kan mga karakter sa ibabaw.

6 Pig. 6. Olimlah, sarong uripon na pagsadire kan prinsipe.

7 Si Abraham nagpapaliwanag sa mga prinsipyo kan Astronomiya, sa laog kan korte nin hade.