An mga Diyos an nagplano kan paglalang nin kinaban asin gabos na mga buhay na yaon diyan---An saindang mga plano para sa ano na aldaw nin paglalang ipinagtalaga.
1 ASIN dangan an Kagurangnan nagsabi: Magduruman kita pababa. Asin sinda nagbaraba sa kapinunan, asin sinda, na iyo an mga Diyos, pinag-organisa asin pinagporma an mga langit asin an kinaban.
2 Asin an kinaban, matapos ini pinagporma, kaidto mayong laman asin mapungaw, nin huli ta sinda dae pa nagporma nin anuman kundi an daga; asin kadikloman an nangingibabaw sa lalawgon nin kantil, asin an Espiritu nin mga Diyos nangaraki sa ibabaw kan lalawgon nin mga tubig.
3 Asin sinda (an mga Diyos) nagsabi: Magkaigwa nin liwanag; asin nagkaigwa nin liwanag.
4 Asin sinda (an mga Diyos) nasabutan an liwanag, nin huli ta ini matingkadon; asin sainda pinagbaranga an liwanag, o nagkausa kaini na pagbarangaon, gikan sa kadikloman.
5 Asin an mga Diyos pinag-apod an liwanag Aldaw, asin an kadikloman sainda pinag-apod na Banggi. Asin ini nangyaring naglipas na gikan sa kabanggihon hanggan kaomagahon saindang pinag-apod na banggi; asin gikan sa kaomagahon hanggan sa kabanggihon saindang pinag-apod na aldaw; asin iyo ini an enot, o an kapinunan, kaidto na saindang pinag-apod na aldaw asin banggi.
6 Asin an mga Diyos man nagsabi: Tuguti na magkaigwa nin sarong kahiwasan sa katahawan nin mga katubigan, asin ini an magbabanga kan mga tubig sa mga katubigan.
7 Asin an mga Diyos pinag-orden an kahiwasan, na tangani na ini magbabanga kan mga katubigan na yaon sa kaibabawan kan kahiwasan; asin ini nangyari, siring na sinda an nag-orden.
8 Asin an mga Diyos pinag-apod an kahiwasan, Langit. Asin ini nangyaring naglipas kaidto gikan kaidto sa kabanggihon hanggan sa kaomagahon na saindang pinag-apod na banggi; asin ini nangyaring naglipas na ini kaidto gikan sa kaomagahon hanggan sa kabanggihon na saindang pinag-apod na aldaw; asin iyo ini an ikaduwang panahon na saindang pinag-apod banggi asin aldaw.
9 Asin an mga Diyos nag-orden, na nagsasabi: Tuguti na an mga katubigan na yaon sa irarm nin langit magkatiripon na magkasararo sa sarong lugar, asin tuguti na an daga magluwas na mara; asin ini nangyaring siring sa saindang pinag-orden;
10 Asin an mga Diyos pinag-anunsiyo na an marang kadagaan, Daga; asin an katiriponan nin pingkasararong mga katubigan, saindang pinag-anunsiyo, an Dakulang Katubigan; asin an mga Diyos nahiling na sinda pinagsunod.
11 Asin an mga Diyos nagsabi: Tuguti na satuyang prepararon an daga na magpatalubo nin mga awot; mga herbo na magtatao nin pisog; an prutas na kayo na magbubunga nin prutas, susog kan saiyang klase, na an pisog kaini magbubunga na kaagid kaini sa ibabaw nin daga; asin ini nangyari, nagin siring sa saindang pinag-orden.
12 Asin an mga Diyos pinag-organisa an daga na magpapatalubo nin kaawotan gikan sa pisog man sana kaini, asin an herbo na magpapatalubo man nin herbo gikan sa pisog kaini, magbubunga nin pisog susog sa klase kaini; asin an daga magpapatalubo nin kahoy gikan sa sadireng pisog, magbubunga nin prutas, na an pisog makakapagpaluwas nin kapareho man sana kaini, na susog sa klase kaini; asin an mga Diyos nahiling na sinda pinagsunod.
13 Asin ini nangyaring naglipas na saindang pinagbilang an mga aldaw; gikan sa kabanggihon hanggan sa kaomagahon saindang pinag-apod na banggi; asin ini nangyaring naglipas, na gikan sa kaomagahon hanggan sa kabanggihon sainda pinag-apod na aldaw; asin ini kaidto sa ikatolong panahon.
14 Asin an mga Diyos pinag-organisa an mga liwanag na yaon sa kahiwasan nin langit, asin pinagkausa sinda na magbabanga kan aldaw gikan sa banggi; asin pinag-organisa sinda na magin para sa mga senyales asin para sa mga kapanahunan, asin para sa mga aldaw asin para sa mga taon;
15 Asin pinag-organisa sinda na magin mga liwanag sa kahiwasan nin langit tanganing magtao nin liwanag sa ibabaw nin kinaban; asin ini nangyari.
16 Asin an mga Diyos pinag-organisa an duwang darakulang mga liwanag, an mas maliwanag maghahade kun aldaw, asin an maluyang liwanag maghahade sa banggi; kaiba an mas maluluyang liwang na saindang pinagpamugtak na mga bitoon man;
17 Asin an mga Diyos ipinagpamugtak sinda sa kahiwasan nin mga kalangitan, tanganing magtaong liwanag sa ibabaw nin kinaban, asin ta maghahade sa aldaw asin sa banggi, asin magkausang bangaon an liwanag gikan sa kadikloman.
18 Asin an mga Diyos pinagbantayan idtong mga bagay na saindang pinag-orden hanggan sinda nagkasurunod.
19 Asin ini nangyaring naglipas na ini kaidto gikan sa kabanggihon hanggan sa kaomagahon na ini kaidto banggi; asin ini nangyaring naglipas na ini kaidto gikan sa kaomagahon hanggan sa kabanggihon na ini kaidto aldaw; asin ini kaidto ikaapat na panahon.
20 Asin an mga Diyos nagsabi: Tuguti na prepararon ta an mga katubigan na magpapaluwas nin kadakulon na mga naghihirong mga linalang na igwang buhay; asin mga gamgam, na tanganing sinda puwedeng maglupad sa ibabaw nin kinaban sa bukas na kahiwasan nin langit.
21 Asin an mga Diyos nag-andam kan mga katubigan na tangani sinda puwedeng magpapaluwas nin mga darakulang balyena, asin nin lambang buhay na linalang na naghihiro, na an mga katubigan magpapaluwas nin kadakulon na susog kan saindang klase; asin lambang pakpakan na gamgam na susog kan saindang klase. Asin an mga Dios nahiling na sinda pinagsusunod, asin ta an saindang plano marahayon.
22 Asin an mga Diyos nagsabi: Satuyang pagbebendisyunan sinda, asin ipagkausa sinda na magin mabinunga asin magdarakol, asin panoon an mga katubigan nin dagat o darakulang mga katubigna; asin ipagkausa na an mga gamgam na magdarakol sa kinaban.
23 Asin ini nangyaring naglipas na ini kaidto gikan sa kabanggihon hanggan sa kaomagahon na saindang pinag-apod na banggi; asin ini nangyaring naglipas na ini kaidto gikan sa kaomagahon hanggan sa kabanggihon na saindang pinag-apod na alaw; asin ini an ikalimang panahon.
24 Asin an mga Diyos pinag-andam an kinaban na magpapaluwas nin mga buhay na linalang susog sa saiyang klase, kabakahan asin mga nagkakanap na mga bagay, asin mga hayop nin kinaban na susog kan saindang klase; asin ini nangyari, siring kan saindang pinagsabi.
25 Asin an mga Diyos pinag-organisa an kinaban na magpapaluwas nin mga hayop susog kan saindang klase, asin kabakahan susog kan saindang klase, asin lambang bagay na nagkakaranap sa ibabaw nin daga susog kan saindang klase; asin an mga Diyos nahiling na sinda magsusurunod.
26 Asin an mga Diyos nin kahulitan sa pairiba kan saindang mga sadire asin nagsabi: Magduruman kita pababa asin magporma nin tawo sa satuyang imahe, susog kan satuyang kaagidan; asin kita magtatao sainda nin dominyon na mangingibabaw sa isda nin dagat, asin mangingibabaw sa gamgam nin paros, asin mangingibabaw sa kabakahan, asin mangingibabaw sa bilog na kinaban, asin mangingibabaw sa lambang nagkakaranap na bagay na nagkakanap sa ibabaw nin daga.
27 Kaya an mga Diyos nagbaraba sa pag-organisa nin tawo sa saindang sadireng imahe, sa imahe nin mga Diyos pinorma ninda siya, lalake asin babaye pinorma sinda ninda.
28 Asin an mga Diyos nagsabi: Satuyang bebendisyunan sinda. Asin an mga Diyos nagsabi: Satuyang ipagkakausa sainda na magin mabinunga asin magdakol, asin lantopon an daga, asin sakopon ini, asin na magkaigwa nin dominyon na mangingibabaw sa isda nin dagat, asin mangingibabaw sa gamgam nin paros, asin mangingibabaw sa lambang buhay na bagay na naghihiro sa ibabaw nin kinaban.
29 Asin an mga Diyos nagsabi: Hilnga, satuyang ipagtatao sainda an lambang herbo na may darang pisog na magtataralubo sa ibabaw kan lalawgon nin bilog na kinaban, asin lambang kahoy na magbubunga nin prutas kaini; iyo, an prutas nin kahoy na magtatao nin pisog sa sainda kita magtatao kaini sainda; ini magigin para sa saindang pagkakan.
30 Asin sa lambang hayop nin daga, asin sa lambang gamgam nin paros, asin sa lambang bagay na nagkakaranap sa ibabaw nin daga, hilnga, kita an magtatao sainda nin buhay, asin man kita magtatao sa sainda lambang berdeng herbo para sa pagkakan, asin gabos na ining mga bagay magigin siring sa pinag-organisa.
31 Asin an mga Diyos nagsabi: Kita maggigibo kan lambang bagay na satuyang pinagsabi, asin orgnisaron sinda; asin hilnga, sinda magigin masinunod-sunod na gayo. Asin ini nangyaring naglipas na ini kaidto gikan sa kabanggihon hanggan sa kaomagahon na saindang pinag-apod na banggi; asin ini nangyaring naglipas na ini kaidto gikan sa kaomagahon hanggan sa kabanggihon na saindang pinag-apod na aldaw; asin saindang pinagbilang na ikaanom na panahon.
