(Disyembre 1830)
Si Enoch nagtutukdo, pinapamayuhan an mga katawohan, nakakapagpahiro nin mga bukid---An Siyudad nin Sion pinag-establisa---Si Enoch pinaghula an pag-abot kan Ake nin Tawo, an saiyang pagbabayad-salang sakripisyo, asin an pagkabuhay-liwat nin mga banal---Saiyang pinaghula an restorasyon, an pagkatiripon-tipon, an Ikaduwang Pag-abot, asin an pagbalik nin Sion.
1 ASIN ini nangyaring naglipas na si Enoch nagpadagos kan saiyang pagtataram, na nagsasabi: Hilnga, an satuyang ama na si Adan nagtukdo kaining mga bagay, asin kadakol an naniwala asin nagin mga ake nin Diyos, asin kadakol an dae naniniwala, asin nagkaparara sa saindang mga kasalan, asin naghihiling na may pagkatakot, tormentado, para sa makangorongirhat na indignasyon sa kaanggutan nin Diyos na ipagbubulos paluwas sa sainda.
2 Asin magpoon kan panahon na idto padagos si Enoch nagpoon na magpropesiya, nagsasabi sa mga katawohan, na: Habang ako nagbibiyahe, asin nakatindog sa lugar nin Mahujah, asin nagngangayo-ngayo sa Kagurangnan, nagkaigwa nin sarong boses na nagluwas gikan sa langit, na nagsasabi---Magbalik ka, asin magpaduman ka sa bukid Simeon.
3 Asin ini nangyaring naglipas na ako nagbalik asin nagpaduman sa bukid; asin habang ako nagtitindog sa may bukid, ako nakahiling na an mga langit nagbukas, asin ako pinaggubingan nin kamurawayan;
4 Asin sakong nahiling an Kagurangnan; asin siya nakatindog sa sakong lalawgon, asin siya nakipag-olay sako, magin siring baga sa sarong tawo na nakikipag-olay sa saro, lalawgon sa lalawgon; asin siya nagsabi sa sako: Hilnga baya, asin Ako magpapahiling sa saimo kan mundo sa laog nin kadakol na mga henerasyon.
5 Asin ini nangyaring naglipas na ako naghiling sa burobukid nin Shum, asin uya, sarong kadakulon na mga katawohan na nag-eerok sa mga tolda, na iyo ngani an katawohan nin Shum.
6 Asin giraray an Kagurangnan nagsabi sa sako: Hilnga; asin ako naghiling sa may parteng habagatan, asin ako naghiling sa mga katawohan nin Canaan, na nag-eerok sa mga tolda.
7 Asin an Kagurangnan nagsabi sa sako: Magpropesiya ka; asin ako nagpropesiya, na nagsasabi: Hilnga an mga katawohan nin Canaan, na kadakulon, na nagraralakaw sa pangiyerang martsa laban sa mga katawohan nin Shum, asin mangagadan sainda na tangani baya na sinda magkakaderestrosong gayo; asin an mga katawohan nin Canaan magbabaranga sa saindang mga sadire sa kadagaan, asin an kadagaan magigin mara asin bakong mabinunga, asin mayong ibang mga katawohan an mag-eerok diyan kundi an katawohan nin Canaan;
8 Nin huli ta hilnga, an Kagurangnan pagsusumpaon an kadagaan nin grabent init, asin an kamarahan kaini magdadanay sa daeng kasagkoran; asin magkakaigwa nin sarong kadikloman na maabot sa gabos na mga kaarakian nin Canaan, na sinda pagpupung-otan sa pag-iriba nin gabos na mga katawohan.
9 Asin ini nangyaring naglipas na an Kagurangnan nagsabi sa sako: Hilnga; asin ako naghiling, asin nahiling ko an kadagaan nin Sharon, asin an kadagaan nin Enoch, asin an kadagaan nin Omner, asin an kadagaan nin Heni, asin an kadagaan nin Shem, asin an kadagaan nin Haner, asin an kadagaan nin Hanannihah, asin an gabos na mga paraerok kaini;
10 Asin an Kagurangnan nagsabi sa sako: Magpaduman ka sa mga katawohang ini, asin magsabi sa sainda---Magsorolsol kamo, na baka Ako magluwas asin paghampakon sinda nin sarong sumpa, asin sinda magkakagaradan.
11 Asin siya nagtao sako nin sarong kasugoan na ako dapat na magbubunyag sa pangaran nin Ama, asin nin Ake, na pano nin grasya asin katotoohan, asin nin Espiritu Santo, na nagpapatotoo sa Ama asin sa Ake.
12 Asin ini nangyaring naglipas na si Enoch nagpadagos sa pagpangapudan sa gabos na mga katawohan, laen lang na ini mga katawohan nin Canaan, na magsorolsol;
13 Asin grabe kadakula an pagtubod ni Enoch na siya annagpangenot sa mga katawohan nin Diyos, asin an saindang mga kaiwal nag-abot sa pakipaggiyera laban sainda; asin siya nagtaram nin tataramon nin Kagurangnan, asin an daga nangubog-kubog, asin an mga bukid nagdurulag, na ngani uyon sa saiyang pagsugo; asin an mga salog nin tubig nagkabaralikwas kan saindang pagdadalayday; asin an atungal nin mga leon nagkadarangog sa luwas nin kaparangan; asin an gabos na mga nasyon magkakatarakot na gayo, grabe kakusog an kapangyarihan kan tataramon ni Enoch, asin grabeng gayo an kapangyarihan kan lengguwahe na an Diyos iyo ang nagtao saiya.
14 Nagkaigwa man nin sarong kadagaan na nagluwas gikan sa kairaroman nin dagat, asin grabeng gayo an katakutan kan mga kaiwal nin mga katawohan nin Diyos, sinda nagdurulag asin nakatindog sa may harayo asin nagduruman sa kadagaan na nagluwas gikan sa kairaroman nin dagat.
15 Asin an mga higante nin kadagaan, nakatindog man sa may harayo; asin naglakop an sarong sumpa sa bilog na katawohan na nakipaglaban kontra sa Diyos;
16 Asin magpoon kan panahon na idto dagos nagkaigwa na nin mga giyera asin pagbubulos nin dugo sa pag-iriba ninda; pero an Kagurangnan nag-abot asin naki-erok kaiba kan saiyang mga katawohan, asin sinda nag-erok sa pagkamatanos.
17 Asin an pagkatakot sa Kagurangnan yaon sa gabos na mga nasyon, grabeng gayo kadakula an kamurawayan nin Kagurangnan, na yaon kaiba kan saiyang mga katawohan. Asin an Kagurangnan nagbendisyon sa kadagaan, asin sinda pinagbendisyunan sa ibabaw nin mga bukid, asin ibabaw nin haralangkaw na mga lugar, asin nagdanay.
18 Asin an Kagurangnan pinag-apod an saiyang mga katawohan na SION, nin huli ta sinda igwa nin sasrong puso asin sarong kaisipan, asin nag-erok sa pagkamatanos; asin mayong pobre sa pag-iriba ninda.
19 Asin si Enoch nagpadagos kan saiyang pagbabalangibog sa pagkamatanos sa mga katawohan nin Diyos. Asin ini nangyaring naglipas sa saiyang mga aldaw, na siya nagtugdok nin sarong siyudad na pinag-apod na Siyudad nin Kabanalan, na iyo ngani an SION.
20 Asin ini nangyaring naglipas na si Enoch nakipag-olay sa Kagurangnan; asin siya nagsabi sa Kagurangnan: Segurado ko na an Sion mag-eerok na ligtas sa daeng kasagkoran. Pero an Kagurangnan nagsabi ki Enoch: An Sion Ako an nagbendisyon, pero an katadaan nin mga katawohan ako an nagsumpa.
21 Asin ini nangyaring naglipas na an Kagurangnan ipinagpahiling ki Enoch an bilog na paraerok nin kinaban; asin saiyang nahiling, asin uya, an Sion, sa proseso kan panahon, pinagkuang pasakat pasiring sa langit. Asin an Kagurangnan nagsabi ki Enoch: Hilnga an sakuyang estaran sa daeng kasagkoran.
22 Asin si Enoch man nahiling an katadaan nin mga katawohan na iyo ngani an mga akeng lalake ni Adan; asin sinda sarong kasalakan kan gabos na banhi ni Adan laen lang ta ini banhi ni Cain, nin huli ta an banhi ni Cain maiitom, asin dae nagkaigwa nin lugar sa pag-iriba ninda.
23 Asin pagkatapos na an Sion pinagkuang pasakat pasiring sa langit, si Enoch nakahiling, asin uya, an bilog na mga nasyon nin kinaban yaon sa atubangan niya;
24 Asin nagkaigwa nin henerasyon sa lambang henerasyon; asin si Enoch yaon sa itaas asin pinagpaitaas, nagin yaon sa daghan kan Ama, asin kan Ake nin Tawo; asin hilnga, an kapangyarihan ni Satanas naglakop sa bilog na lalawgon nin kinaban.
25 Asin saiyang nahiling an mga anghel na nagbaraba gikan sa langit; asin saiyang nadangog an sarong makusugon na boses na nagsasabi: Herak man, kasakitan an maabot sa mga paraerok kan kinaban.
26 Asin saiyang nahiling si Satanas; asin siya may kapot nin sarong dakulang kadena sa saiyang kamot, asin ini nag nagbelo sa bilog na lalawgon kan kinaban nin kadikloman; asin nagtangad paitaas asin naghalakhak, asin an saiyang mga anhel nagka-orogma.
27 Asin si Enoch nahiling an mga anghel nagbabaraba paluwas sa langit, na nagpapatotoo sa Ama asin Ake, asin an Espiritu Santo naglukod sa kadakol, asin sinda pinagdara sa paagi kan mga kapangyarihan nin langit palaog sa Sion.
28 Asin ini nangyaring naglipas na an Diyos nin Langit naghiling sa katadaan nin mga katawohan, asin siya nagtangis; asin si Enoch nagpatotoo kaini, na nagsasabi: Tadaw baya ta nangyari na an mga kalangitan nagtatangis, asin nagpaturo kan saindang mga luha na siring sa uran sa ibabaw nin mga bukid?
29 Asin si Enock nagsabi sa Kagurangnan: Tadaw baya po ta ika nagtatangis, nahihiling na ika banal, asin gikan sa bilog na eternidad hanggan sa gabos na eternidad?
30 Asin ini daw po posible na an tawo makakapagbilang nin mga partikulo kan kinaban, iyo, milyones na mga kinaban na siring kaini, ini bakong sarong kapinunan sa bilang nin saimong mga linalang; asin an saimong mga kurtina dagos pa na nakaladlad sa luwas; asin baya ika yaon duman, asin an saimong daghan yaon duman; asin man ika baya husto; ika napapano nin pagkaherak asin kabootan sagkod sa daeng kasagkoran;
31 Asin Ika an nagkua kan Sion sa saimong sadireng daghan, gikan sa bilog mong mga linalang, gikan sa bilog na eternidad hanggan sa gabos na eternidad; asin mayo kundi katuninongan, hustisya, asin katotoohan an yaon sa saimong trono; asin pagkaherak an magpaduman sa atubangan nin saimong lalawgon asin daeng katapusan; tadaw baya po ta ika nagtatangis?
32 Asin an Kagurangnan nagsabi ki Enoch: Hilnga ining saimong mga katugangan; sinda an kaggibohan nin sakuyang sadireng mga kamot, asin Ako an nagtao sa sainda nin saindang kaaraman, kan aldaw na Ako an naglalang sainda; asin sa Hardin nin Eden, Ako nagtao sa tawo nin saiyang ahensiya;
33 Asin sa saimong mga katugangan Ako baya nagsabi, asin man nagtao nin kasugoan, na sinda dapat na mamoot sa lambang saro, asin ta sinda dapat na magpili sako, an saindang Ama; pero hilnga, sinda mayong pagmati, asin sinda nag-oongis kan saindang sadireng dugo;
34 Asin an kalayo nin sakuyang indignasyon nasindi laban sainda; asin sa sakuyang mainit na kadisganaran Ako magpapadara nin mga baha sa sainda, nin huli ta an sakuyang makuring kaanggutan nagsindi laban sainda.
35 Hilnga, Ako an Diyos; Tawo nin Kabanalan iyo an sakuyang pangaran; Tawo nin Paghulit iyo an sakuyang pangaran; asin Daeng Katapusan asin Eternal iyo an sakuyang pangaran, man.
36 Kumbaya, Ako nakapagbingat kan sakuyang mga kamot asin kaputan an gabos na linalang na Ako an naghimo; asin an sakuyang mata makakapagtusok sainda man, asin sa pag-iriba kan gabos na kaggibohan nin sakuyang mga kamot dae nagkaigwa nin grabe kadakulang karigsokan na siring sa pag-iriba nin saimong mga katugangan.
37 Kundi hilnga, an saindang mga kasalan magigin yaon sa mga payo kan saindang mga ama; si Satanas iyo an magigin saindang ama, asin katiosan iyo an magigin saindang kahukuman; asin an bilog na mga kalangitan magtatangis para sainda, magin an gabos na kaggibohan kan sakuyang mga kamot; kumbaya dapat daw na an mga kalangitan dae magtangis, na nahihiling an mga ining nagsasakit?
38 Pero hilnga, an mga ini na nahihiling kan saimong mga mata mapapara nin mga baha; asin hilnga, Ako an magsasarado sa sainda; sarong prisohan Ako an nag-andam para sainda.
39 Asin Iyan na Ako an nagpili nagngayo-ngayon sa atubangan nin sakuyang lalawgon. Kumbaya, siya an nagsasakit para sa saindang mga kasalan; na habang sinda magsosolsol sa aldaw na an sakuyang Pinili magbabalik sa sako, asin sagkod sa aldaw na iyan sinda yaon sa pagsasakit;
40 Kumbaya, nin huli kaini an mga kalangitan magtatangis, iyo, asin an gabos na kaggibohan nin sakuyang mga kamot.
41 Asin ini nangyaring naglipas na an Kagurangnan nagtaram ki Enoch, asin nagsabi ki Enoch kan gabos na mga naginibohan nin mga kaarakian nin mga tawo; kumbaya si Enoch nakaaram, asin nakapaghiling kan saindang mga karigsokan, asin an saindang katiosan, asin nagtangis asin nagbingat kan saiyang takyag, asin an saiyang puso nagdakula nin lawig na siring sa eternidad; asin an saiyang mga kalamnan nagpungaw; asin an bilog na eternidad nagtanyog.
42 Asin si Enoch man nahiling si Noah, asin an saiyang pamilya; na an kamakoapoan kan gabos na mga akeng lalake nin Noah dapat na maligtas nin sarong temporal na kaligtasan;
43 Kumbaya si Enoch nahiling na si Noah naggibo nin sarong arko; asin ta an Kagurangnan naghiyom kaini, asin pinangaputan ini kan saiyang sadireng kamot; pero sa katadaan nin maririgsok an mga baha nag-abot asin pinaghalon sinda kaini.
44 Asin si Enoch nahiling ini, siya nagkaigwa nin kapaitan nin kalag, asin nagtangis para sa saiyang mga katugangan, asin nagsabi sa mga kalangitan: Ako habong magpalinga; pero an Kagurangnan nagsabi ki Enoch: Ipagtaas an saimong puso, asin magin maogma; asin hilnga.
45 Asin ini nangyaring naglipas na si Enoch naghiling; asin gikan ki Noah, saiyang nahiling an bilog na mga pamilya nin kinaban; asin siya napahibi sa Kagurangnan, na nagsasabi: Noarin po an aldaw nin Kagurangnan maabot? Noarin po an dugo kan Matanos pagpapabuluson, na tangani gabos sinda na nagmomondo mapuwedeng pakabanalon asin magkaigwa nin eternal na buhay?
46 Asin an Kagurangnan nagsabi: Ini mangyayari sa kaluntukan nin panahon, sa mga aldaw nin karigsokan asin kabalusan.
47 Asin hilnga, si Enoch nahiling an aldaw nin pag-abot kan Ake nin Tawo, nagin yaon sa laman; asin an saiyang kalag nag-ogma, na nagsasabi: An Matanos ipinagpa-itaas, asin an Kordero pinaggadan gikan sa pundasyon nin mundo; asin sa paagi nin pagtubod ako yaon sa daghan nin Ama, asin hilnga, an Sion yaon kaiba ko.
48 Asin ini nangyari na si Enoch naghiling sa ibabaw nin kinaban; asin siya nakadangog nin sarong boses gikan pa sa kairaroman kaini, na nagsasabi: Herak man, herak an yaon sako, an ina nin mga tawo; ako nakukulugan, ako pinanluluyahan, nin huli sa karigsokan nin sakuyang mga kaarakian. Noarin ako makakapaghingalo, asin mahugasan gikan sa kaatian na nagluwas gikan sako? Noarin na an sakuyang Kaglalang pakabanalon ako, na tangani baya ako makapagpahingalo, asin an pagkamatanos para sa sarong kapanahunan makapag-antabay sa sakuyang lalawgon?
49 Asin kan si Enoch nadangog an kinaban nag-agrangay, siya nagtangis, asin naghihibi sa Kagurangnan, na nagsasabi: O Kagurangnan, dae ka daw magkaigwa nin herak sa kinaban? Dae mo daw mabendisyunan an mga kaarakian ni Noah?
50 Asin ini nangyaring naglipas na si Enoch nagdagos sa nagngangayo-ngayo sa Kagurangnan, na nagsasabi: Ako minahagad saimo, O Kagurangnan, sa pangaranin nin saimong Bugtong na Pinili, na iyo ngani si Jesukristo, na ika po magkaigwa nin pagkaherak ki Noah asin sa saiyang banhi, na an kinaban mapuwedeng dae na pagkunupan nin baha.
51 Asin an Kagurangnan dae nakapagpugol; asin nakipagtipan ki Enoch, asin nanumpa saiya nin sarong kasumpaan, na saiyang pagpapadanayon an mga baha; na saiyang pag-aapudon an mga kaarakian ni Noah;
52 Asin siya nagpadara paluwas nin sarong dae nababag-ong dekreto, an an sarong katadaan nin saiyang banhi dapat pirmeng mananagboan sa pag-iriba nin gabos na mga nasyon, habang an kinaban dagos na matitindog;
53 Asin an Kagurangnan nagsabi: Pagbendisyunan siya na sa paagi niya an banhi an Mesiyas maggigikan; nin huli ta siya nagsabi---Ako an Mesiyas, an Hade nin Sion, an Gapo nin Langit, na halakwason siring sa eternidad; an siisay man na magdulok sa may pintuan asin magsasakat paitaas sa paagi ko dae mahuhulog; kumbaya, pagbendisyunan sinda na sakong pinagsasabi, nin huli ta sinda maarabot na may mga kanta nin daeng katapusan na pagkaogma.
54 Asin ini nangyaring naglipas na si Enoch nagngayongayo sa Kagurangnan, na nagsasabi: Kunsoarin po na an Ake nin Tawo mag-abot na yaon sa laman, makakapagpahingalo na daw po an kinaban? Ako minahagad po saimo, na ipagpahiling mo po ining mga bagay.
55 Asin an Kagurangnan nagsabi ki Enoch: Hilnga, asin siya naghiling asin nahiling an Ake nin Tawo ipinagpaitaas sa krus, na susog sa manera nin mga tawo;
56 Asin siya nakadangog nin sarong makusugon na boses; asin an mga kalangitan pinagbelohan; asin an gabos na linalang nin Diyos nagmondo; asin an daga nag-agrangay; asin an mga gapo nagkabaraak; asin an mga banal nagburuhat, asin pinagkoronahan sa may toong kamot kan Ake nin Tawo, nin mga korona nin kamurawayan;
57 Asin habang kadakol kan mga espiritu na yaon sa laog kan prisohan nagdudurulok, asin nagtitindog sa may toong kamot nin Diyos; asin an tada pinagreserba para sa mga kadena nin kadikloman hanggan sa paghukom kan dakulang kaaldawan.
58 Asin giraray si Enoch nagtangis and naghihibi sa Kagurangnan, na nagsasabi: Noarin po tabi an kinaban makapagpahingalo?
59 Asin si Enoch nahiling an Ake nin Tawo nagsakat pasiring sa Ama; asin siya nangapudan sa Kagurangnan, na nagsasabi: Dae ka na po ba magbalik giraray sa kinaban? Nin huli ta habang ika sarong Diyos, asin ako nakakabisto saimo, asin ika nanumpaan sako, asin nagsugo sako na ako maghahagad sa pangaran nin saimong Bugtong na Pinili; ika po an naghimo sako, asin an nagtao sakuya nin sarong karapatan sa saimong trono, asin bako sa sakong sadire, kundi sa paagi nin saimong sadireng grasya; kumbaya, ako maghahapot tabi saimo kun ika po dae na mabalik giraray sa kinaban.
60 Asin an Kagurangnan nagsabi ki Enoch: Habang ako nabubuhay, arog kaini Ako maabot sa huring mga aldaw, sa mga aldaw nin karigsokan asin kabalusan, tanganing utubon an panunumpa na Ako an naghimo sa saimo mapanungod sa mga kaarakian ni Noah;
61 Asin an aldaw mangyayaring maabot na an kinaban makakapahingalo, pero bago pa man an aldaw na iyan an mga kalangitan magdidiklom, asin sarong belo nin kadikloman an magkukunop sa kinaban; asin an mga kalangitan magtatanyog, asin man an kinaban; asin darakulang mga tribulasyon an magigin yaon sa pag-iriba nin mga kaarakian nin mga tawo, pero sa sakuyang mga katawohan ako an mapreserba;
62 Asin an pagkamatanos Ako an magpapadara sa ibaba paluwas sa langit; asin an katotoohan Ako magpapadara sa kinaban, tanganing magpapatotoo sa testimonya nin sakuyang Bugtong na Pinili; an saiyang pagkabuhay-liwat gikan sa mga gadan; iyo, asin man an pagkabuhay-liwat nin mga gabos na mga tawo; asin an pagkamatanos asin katotoohan Ako an magkakausa na maglakop sa kinaban na siring sa sarong baha, tanganing pagtitiriponon an sakuyang mga pinili gikan pa sa apat na mga rona kan kinaban, pasiring sa sarong lugar na Ako an mag-aandam, sarong Banal na Siyudad, na an sakuyang mga katawohan mapuwedeng magburugkos nin saindang mga habayan, asin maghahalat para sa panahon nin sakuyang pag-abot; nin huli ta mapapasainda an sakuyang tabernakulo, asin ini pag-aapudon na Sion, an Bagong Jerusalem.
63 Asin an Kagurangnan nagsabi ki Enoch: Dangan ika asin an bilog mong siyudad maghihirilingan duman, asin satuyang pagreresibihon sinda palaog sa sakuyang daghan, asin saindang mahihiling kita; asin kita maghihipray sa saindang mga liog, asin sinda maghihipray sa satuyang mga liog, asin kita maghahadok sa lambang saro;
64 Asin duman an sakuyang erokan, asin ini magigin Sion, na minagikan paluwas sa bilog na nga linalang na Ako an naghimo; asin sa laog nin sanribong taon an kinaban magpapahingalo.
65 Asin ini nangyaring naglipas na is Enoch nahiling an aldaw nin pag-abot kan Ake nin Tawo, sa huring mga aldaw, sa pag-erok sa kinaban sa pagkamatanos para sa laog nin sanribong taon;
66 Pero bago pa an aldaw na iyan saiyang nahiling an mga darakulang tribulason sa pag-iriba nin mga maririgsok; asin saiya man nanhiling an dagat, na ini yaon sa karinsalan, asin an mga puso nin mga tawo nagpapatihulog sainda, naghihiling pangenot namay pagkatakot para sa mga paghuhukom kan Makakamhan na Diyos, na dapat na magkunop sa maririgsok.
67 Asin an Kagurangnan pinagpahiling ki Enoch an gabos na mga bagay, magin sagkod sa katapusan kan mundo; asin saiyang nahiling an aldaw kan mga matanos, an oras nin saindang katubusan, asin magresibe nin sarong kabilugan nin pagkaogma;
68 Asin an gabos na mga aldaw nin Sion, sa mga aldaw ni Enoch, minaabot nin tolong gatos asin anom na pulo may limang taon;
69 Asin si Enoch asin bilog niyang mga katawohan naglakaw kaiba an Diyos, asin siya nag-erok sa katahawan nin Sion; asin ini nangyaring naglipas na an Sion nawara, nin huli ta an Diyos an nagresibe kaini sa itaas pasiring sa laog kan saiyang daghan; asin magpoon kaidto nagdanay an kasabihan, an SION PINAGKUA.
