An salik gikan sa translasyon kan Bibliya siring sa ipinagpahayag ki Joseph Smith an Propeta kan 1831: Mateo 23:39 asin tsapter 24.
Si Jesus an nagpatanid kan napupugulan na kapahamakan kan Jerusalem---Siya man nagdiskurso kan ikaduwang pag-abot kan Ake nin Tawo, asin an kapahamakan nin mga maririgsok.
1 NIN HULI TA Ako nagsasabi sa saindo, na kamo dae makakahiling sako magpoon ngonyan asin makaaram na Ako iyo siya na ipinagsurat sa paagi kan mga propeta, sagkod na kamo makapagsasabi: Pagbendisyunan siya na nag-abot sa pangaran nin Kagurangnan, sa mga panginuron nin langit, asin an gabos na mga banal na mga anghel na kaiba niya. Dangan nasabutan kan saiyang mga desipulos na siya dapat na mag-abot giraray sa kinaban, pagkatapos na siya maipagpamuraway asin makoronahan sa toong kamot nin Diyos.
2 Asin si Jesus nagluwas, asin naghale gikan sa templo; asin an saiyang mga desipulos nagdurulok saiya, para madangog siya, na nagsasabi: Maestro, ipahiling mo samuya an manunungod sa mga pagharongon kan templo, siring kan saimong pinagsabi---Sinda paghuhugnakon pababa, asin iwalat sa saimo na mapungawon.
3 Asin si Jesus nagsabi sa sainda: Dae nindo nahihiling an gabos na mga bagay na ini, asin kamo dae nakakasabot sainda? Katotohanan, Ako nagsasabi sa saindo, dae magkakaigwa nin walat digde, sa ibabaw kaining templo, sarong gapo sa ibabaw kan iba na dae ipaghuhugnak pababa.
4 Asin si Jesus pinagwalat sinda, asin nagdman sa may Bukid nin mga Olibo. Asin habang siya nakatukaw sa may Bukid nin mga Olibo, an saiyang mga desipulos pribadong nagdurulok sa saiya, na nagsasabi: Sabiha po tabi samuya kun noarin na an mga bagay na ini mangyayari na saimong pinagsasabi na mapanungod sa kapahamakan kan templo, asin kan mga Hudiyo; asin ano baya an senyal kan saimong pag-abot, asin kan katapusan nin mundo, o an kapahamakan nin mga maririgsok, na iyo ngani an katapusan nin mundo?
5 Asin siya nagsimbag, asin nagsabi sa sainda: Magdangog baya na tanganing mayong tawo an makakapagdaya saindo;
6 Nin huli ta kadakol an maarabot sa sakuyang pangaran, na magsasabi---Ako an Kristo---asin makakapagdaya nin kadakol;
7 Dangan sainda kamong pagdadarahon na magkasarakitan, asin paggagadanon kamo, asin kamo pag-oongisan kan gabos na mga nasyon, nin huli sa sakuyang pangaran;
8 Asin dangan kadakol an magkaka-aranggot, asin magsasaluib sa lambang saro, asin magkaka-orongis sa lambang saro;
9 Asin kadakol na mga palsong propeta an magtitirindog, asin magdadaya nin kadakulon;
10 Asin ta nin huli sa kadaendatahan na magdadakol, an pagkamoot nin kadakol magigin malipot;
11 Pero siya na yaon sa paninindugan asin dae nadaog, iyo man sana an maliligtas.
12 Kunsoaring na kamo, kaya, makakahiling kan abominasyon nin kalipungawan, na pinagtaram ni Daniel an Propeta, mapanunungod sa kapahamakan kan Jerusalem, dangan kamo magtitindog sa banal na lugar; an siisay man an nakakabasa tuguti siyang makasabot.
13 Dangan tuguti sinda na yaraon sa Judea na magdurulag pasiring sa mga kabukidan;
14 Tuguti siya na yaon sa itaas kan atop na magdulag, asin dae magbalik tanganing magkua nin anuman gikan sa saiyang harong;
15 Ni tugutan siya na yaon sa omahan na magbalik tanganing magkua nin saiyang mga gubing;
16 Asin herak man sa sainda na kairiba nin mga ake, asin sa sainda na nagpapasuso sa mga aldaw na iyan;
17 Kun kaya, magpangadye kamo sa Kagurangnan na an saindong pagbiyahe bakong taglipot, ni aldaw nin Sabbath;
18 Nin huli ta uya, sa mga aldaw na iyan, magkakaigwa nin dakulang tribulasyon sa mga Hudiyo, asin sa mga paraerok kan Jerusalem, siring baga sa dae pa naipagpadara kaidto sa Israel, nin Diyos, magpoon pa sa kapinunan kan saindang kahadean sagkod sa ngonyan na panahon; dae pa, ni mangyayari pa giraray ipagpapadara sa Israel.
19 An gabos na mga bagay na pinagpahurulog sa sainda iyo sana an kapinunan kan mga kamondoan na mag-aarabot sa sainda.
20 Asin laen lang idtong mga aldaw na dapat na pagpahalipoton, mayo dapat kan saindang mga laman an maililigtas; pero nin huli sa kapakanan kan mga pinili, na uyon sa tipan, idtong mga aldaw pagpapahalipoton.
21 Hilnga, ining mga bagay Ako an nagtaram sa saindo manunungod sa mga Hudiyo; asin giraray, pagkatapos nin tribulasyon sa mga aldaw na idto na maabot sa Jerusalem, kun an siisay na tawo an magsasabi sa saindo, Uya, yaon si Kristo, o duman, dae kamo maniwala saiya;
22 Nin huli ta sa mga aldaw na idto magkakaigwa man nin mga palsong mga Kristo, asin palsong mga propeta, asin magpapahiling nin mga darakulang senyales asin mga kangangalasan, na tangani baya, na, kun posible, sinda makakapagdaya sa piniling gayo, na mga pinili uyon sa tipan.
23 Hilnga, Ako nagtataram kaining mga bagay sa saindo para sa kapakanan kan mga pinili; asin kamo man makakadangog nin mga giyera, asin mga huringhuding nin mga giyera; hilnga baya na kamo dae marinsal, nin huli ta an gabos na Ako an nakapagsabi saindo kaipuhan na mangyayari; pero an katapusan bako pa.
24 Hilnga, Ako nakapagsabi saindo kaidto;
25 Kumbaya, kun sinda magsasabi sa saindo: Hilnga, siya yaon sa disyerto; dae kamo magduman: Hilnga, siya yaon sa sikretong mga taguan; dae kamo maniwala kaini;
26 Nin huli ta siring kan liwanag nin kaomagahon na minasirang sa may sirangan, asin nagsisirang ngani sa may sulnupan, asin pinaglalakupan an bilog na kinaban, iyo man an magigin pag-abot kan Ake nin tawo.
27 Asin ngonyan Ako magpapahiling saindo nin sarong parabola. Hilnga, kun saen ngani an gadan na hayop, yaon man duman an mga agila na nagkatiripon-tipon na nagkasararo; siring man kaini an mangyayari sa sakuyang mga pinili na magkakatiripon gikan sa apat na rona nin kinaban.
28 Asin sinda makakadangog nin mga giyera, asin mga huringhuding nin mga giyera.
29 Hilnga Ako mataram para sa kapakanan nin sakuyang mga pinili; nin huli ta an nasyon maalsa laban sa sarong nasyon, asin kahadean laban sa sarong kahadean; magkakaigwa nin mga taggutom, asin mga kapestehan, asin mga linog, sa manlaen-laen na mga lugar.
30 Asin giraray, nin huli sa an kadaendatahan magdadakol, an pagkamoot nin mga tawo magigin malipoton; pero siya dae madadaog, siya man sana an maliligtas.
31 Asin giraray, ining Ebanghelyo nin Kahadean ipagbabalangibog sa bilog na mundo, bilang sarong testigo sa gabos na mga nasyon, asin dangan maabot an katapusan, o an kapahamakan kan mga maririgsok;
32 Asin giraray an abominasyon nin kalipungawan, siring kan sinabi ni Daniel an propeta, mauutob.
33 Asin tulos pagkatapos kan tribulasyon kan mga aldaw na idto, an saldang magdidiklom, asin an bulan dae magbabanaag kan saiyang liwanag, asin an mga bitoon magkakahurulog gikan sa langit, asin an mga kapangyarihan nin langit magkakataranyog.
34 Katotohanan, Ako nagsasabi sa saindo, an henerasyon na ini, na kun saen baya ining mga bagay ipagpapahiling, dae maglilipas hanggan an gabos na pinagsasabi ko magkaka-urutob.
35 Maski na ngani, an mga aldaw mag-aarabot, na an langit asin an kinaban maglilipas; alagad an sakuyang mga tataramon dae maglilipas, kundi an gabos magkaka-urutob.
36 Asin, siring kan sinabi ko kaidto, pagkatapos kan tribulasyon kaidtong mga aldaw, asin an mga kapangyarihan nin kalangitan magkakataranyog, dangan pa maluwas an senyal kan Ake nin Tawo sa langit, asin kasunod na an gabos na mga tribu nin kinaban magmomondo; asin saindang mahihiling an Ake nin Tawo na nagbababa sa mga panginuron nin langit, na may kapangyarihan asin dakulang kamurawayan;
37 Asin an siisay man an nagpapahalaga kan sakuyang tataramon, dae madadaya, nin huli ta an Aken nin Tawo maabot, asin saiyang ipagpapadara an saiyang mga anghel pangenot saiya na may dakulang tunog nin sarong trumpeta, asin saindang pagtitiponon na magkasararo an katadaan kan saiyang mga pinili na gikan sa apat na paros, gikan sa sarong puro nin langit hanggan sa saro.
38 Ngonyan makanuod sa sarong parabola nin igos na kahoy---Kunsoarin na an mga sanga kaini marulumoy pa, asin ini mapoon sa pagtalubo nin mga dahon, ika nakakaaram na an tag-init yaon na;
39 Kaya pareho man, an sakuyang mga pinili, kunsoarin na saindang mahihiling an gabos na ining mga bagay, sinda nakakaaram na siya harani na, na yaon na ngani sa mga pintuan;
40 Pero sa aldaw na iyan, asin oras, mayo ni saro an nakakaaram; mayo, bako an mga anghel nin Diyos sa langit, kundi an sakuyang Ama sana.
41 Pero siring kaidto sa mga aldaw ni Noah, iyo man ini an mangyayari sa pag-abot kan Ake nin Tawo;
42 Nin huli ini mangyayari sainda, siring kaidto sa mga aldaw bago pa an baha; nin huli ta hangga an aldaw na si Noah naglaog sa arko sinda nagkakarakan asin nag-iirinoman, nag-aaragom asin ipinagtatao para sa kasal;
43 Asin daeng pagkaaram hanggan an baha nag-abot, asin pinag-anod sinda gabos paharayo; iyo man an magigin mangyayari sa pag-abot kan Ake nin tawo.
44 Dangan pa mauutob an mga bagay na ipinagsurat, na sa huring mga aldaw, duwa an yaon sa daga, an saro pagkukuahon, asin an saro ipagwawalat;
45 Duwa an maggigiling sa gilingan, an saro pagkukuahon, asin an saro ipagwawalat;
46 Asin kun ano Ako magsasabi sa saro, Ako magsasabi sa gabos na mga tawo; magbantay baya, nin huli ta kamo dae nakakaaram kun ano an oras na an saindong Kagurangnan maabot.
47 Pero arama ini, kun an marahayon na tawo nin harong nakakaaram na kun noaring an parahabon maabot, siya dae magbabantay, asin dae pagtutugutan na an saiyang harong malaogan, kundi magigin pirmeng handa.
48 Kun kaya magigin pirme man kamong handa, nin huli ta sa arog kaining oras kamo dae makakaisip, an Ake nin Tawo maabot.
49 Siya, baya, an matapat asin madunong na surugoon, na an saiyang kagurangnan naghimo na tagapagpamahala kan saiyang pagharongon, na ipagtao sainda an kakanon sa tinakdang kapanahunan?
50 Pagbendisyunan ining surugoon na an saiyang kagurangan, kunsoarin na siya nag-abot, mananagboan na naggigibo; asin katotohanan Ako nagsasabi sa saindo, saiyang paghihimoon siya na magin tagapagpamahala sa bilog niyang mga bagay.
51 Pero kun iyang maranot na surugoon magsasabi sa laog kan saiyang puso: An sakuyang kagurangnan naabala kan saiyang pag-abot,
52 Asin magpoon sa paghampak kan saiyang kapwa-surugoon, asin magkakarakan asin mag-iirinom kaiba nin mga buratsero,
53 An kagurangnan kaiyang surugoon maabot sa aldaw kunsoarin siya dae naghahanap saiya, asin sa oras na siya daeng pagkamangno,
54 Asin pagpuputulon siya sa kadakol na parte, asin ipagtatalaga saiya an saiyang hiras kaiba kan mga hipokrito; magkakaigwa nin pagtatangis asin pagrag-ot nin mga ngipon.
55 Asin kaya minaabot an katapusan nin mga maririgsok, na uyon sa propesiya ni Moises, na nagsasabi: Sinda pagpuputulong gikan sa pag-iriba nin mga katawohan; pero an katapusan kaining kinaban dae pa, kundi aban-aban pa.
