Si Abraham nakanuod manunungod sa saldang, bulan, asin mga bitoon sa paagi kan Urim asin Thummim---An Kagurangnan nagpahayag saiya kan eternal na natura kan mga espiritu---Siya nakanuod kan buhay bago pa an buhay sa kinaban, an katalagahan, an paglalalang, an pagpipili kan sarong Paratubos, asin an ikaduwang estado nin tawo.
1 ASIN ako, si Abraham, dara an Urim asin Thummim, na an Kagurangnan na sakuyang Diyos an nagtao sako, sa Ur kan Caldeo;
2 Asin ako nakahiling nin mga bitoon, na sinda grabeng gayo kadakulon, asin an saro sainda haranihong gayo sa trono nin Diyos; asin igwa pa nin kadakol na maningningon na harani kaini;
3 Asin an Kagurangnan nagsabi sako: An mga ini an mga nagpapamahala; asin an pangaran kan pinakadakula Kolob, nin huli ta ini haranihon sako, nin huli ta Ako an Kagurangnan na saimong Diyos: Ako an nagpamugtak kaining saro tanganing magpapamahala kan gabos ninda na kabali sa kaparehong orden na siring kaiyan na saimong pinagtitindogan.
4 Asin an Kagurangnan nagsabi sako, sa paagi kan Urim asin Thummim, na an Kolog susog sa manera nin Kagurangnan, uyon sa mga oras asin mga kapanahunan nin pag-inog kaini; na an sarong pag-inog iyo an sarong aldaw para sa Kagurangnan, na susog kan saiyang manera nin kabilangan, ini katumbas nin sanribong taon na uyon sa oras na pinagtalaga kaiyan na kun saen ika nagtitindog. Iyo ini an kabilangan kan oras nin Kagurangnan, na kapareho sa kabilangan nin Kolob.
5 Asin an Kagurangnan nagsabi sako: An planeta na igwang hababaon na liwanag, mas hababa kaiyan na naghahade sa aldaw, na siring sa banggi, ini mas halangkaw o mas dakulaon kaiyan na kun saen ika nagtitindog sa punto nin kabilangan, nin huli ta ini naghihiro sa orden nin mas maluya; ini may kahusayan nin huli ta ini yaon sa ibabaw nin kinaban na kun saen ika nagtitindog, kun kaya an kabilangan kan oras kaini bakong dakulon na gayo na siring sa bilang kan mga aldaw, asin kan mga bulan, asin kan mga taon.
6 Asin an Kagurangnan nagsabi sako: Ngonyan, Abraham, ining duwang bagay yaon, hilnga an saimong mga mata nakakahiling kaini; ini ipinagtao sa saimo na ika makaaram sa mga oras nin kabilangan, asin sa katalagahan nin panahon, iyo, an katalagahan kan kinaban na kun saen ika nagtitindog, asin an katalagahan kan oras para sa mas halangkawon na liwanag na ipinagpamugtak na iyo an magdadanay kun aldaw, asin an katalagahan nin oras para sa hababaon na liwanag na ipinagpamugtak na iyo an magdadanay kun banggi.
7 Ngonyan an katalagahan nin oras para sa hababaon na liwanag iyo an mas halawig na oras sa kabilangan kaini kesa kabilangan kan oras nin kinaban na kun saen ika nagtitindog.
8 Asin saen na an duwang bagay na ini yaon, magkakaigwa pa nin ibang bagay na halangkawon sainda, na ini, magkakaigwa nin iba pang planeta na an kabilangan nin oras mas halawig;
9 Asin kaya magkakaigwa nin kabilangan nin oras an sarong planeta na labaw sa iba, sagkod na ika makapagdulok sa Kolob, na an Kolob na ini susog sa kabilangan kan oras nin Kagurangnan; na an Kolob na ini ipinagpamugtak na haranihon sa trono nin Diyos, tanganing magpapamahala kan gabos na ining mga planeta na kabilang sa kaparehong orden na siring kaiyan na kun saen ika nagtitindog.
10 Asin ini ipinagtao sa saimo na makaaram an katalagahan nin oras kan gabos na mga bitoon na ipinagtalaga sa pagtao nin liwanag, sagkod na ika makapagdulok harani sa trono nin Diyos.
11 Kaya ako, si Abraham, nakipag-olay sa Kagurangnan, lalawgon sa lalawgon, bilang sarong tawo na nakipag-olay sa iba; asin siya nagsabi sako kan mga kaggibohan na an saiyang mga kamot an naghimo;
12 Asin siya nagsabi sako: Ake ko, ake ko (asin an saiyang kamot nakabiklad), hilnga Ako magpapahiling saimo kan gabos na ini. Asin saiyang binugtak an saiyang kamot sa sakuyang mga mata, asin ako nakahiling kaidtong mga bagay na an saiyang mga kamot an naghimo, na kadakulon na gayo; asin sinda nagparadakol sa atubangan nin sakuyang mga mata, asin ako dae makakahiling sa katapusan baya kaini.
13 Asin siya nagsabi sako: Ini iyo an Shinehah, na iyo an saldang. Asin siya nagsabi sako: Kokob, na iyo an bitoon. Asin siya nagsabi sako: Olea, na iyo an bulan. Asin siya nagsabi sako: Kokaubeam, na minapanungod sa mga bitoon, o an gabos na darakulang liwanag, na yaon sa kahiwasan nin langit.
14 Asin kaidto oras nin banggi kunsoarin na an Kagurangnan nagsabi kaining mga tataramon sako: Ako an magpapadakol saimo, asin kan saimong banhi na masurunod saimo, na siring kan mga ini; asin kun ika makakapagbilang kan numero nin mga baybay, iyo man an magigin bilang kan saimong mga banhi.
15 Asin an Kagurangan nagsabi sako: Abraham, Ako nagpahiling kaining mga bagay sa saimo bago ka pa magpasiring sa Ehipto, na tanganing saimong ipagdedeklara an gabos na ining mga tataramon.
16 Kun may duwang bagay na yaon, asin magkaigwa nin saro labaw sa iba, magkakaigwa nin mga dakulaon na mga bagay na labaw sainda; kun kaya an Kolob iyo an pinagkadakula sa gabos na mga Kokaubeam na saimong nahiling, nin huli ta ini haranihon sa sako.
17 Ngonyan, kun igwa nin duwang mga bagay, an saro labaw sa iba, asin an bulan magin yaon sa ibabaw nin kinaban, kaya ini puwede na an sarong planeta o sarong bitoon yaon sa ibabaw kaini; asin mayong bagay na an Kagurangnan na saimong Diyos magkua gikan sa puso niya na gigibohon kundi kun ano an saiyang paggigibohon kaini.
18 Kaya baya siya an naghimo nin dakulaon na bitoon; siring man, kun igwa nin duwang espiritu, asin an saro magigin mas intelihente kesa sa iba, alagad ining duwang mga espiritu, maski na ngani na an saro mas intelihente kesa sa iba, mayong kapinunan; sinda eksistido na kaidto, sinda daeng katapusan, sinda mag-eeksister pagkatapos, nin huli ta sinda gnolaum, o eternal.
19 Asin an Kagurangnan nagsabi sako: An duwang mga bagay na ini yaon, na igwa nin duwang espiritu, an saro mas intelihente kesa sa iba; igwa pang mas intelihente kesa sa sainda; Ako an Kagurangnan na saimong Diyos, Ako mas intelihente kesa sainda gabos.
20 An Kagurangnan na saimong Diyos nagpadara nin anghel tanganing iligtas ka gikan sa mga kamot kan mga pade nin Elkenah.
21 Ako nag-erok sa katahawan ninda gabos; Ako ngonyan, kaya, nagbaba para saimo tanganing ideklara sa saimo an mga kaggibohan nin sakuyang mga kamot na nahimo na, na kun saen an sakuyang kadunungan mas minalabaw pa kesa sainda gabos, nin huli ta Ako maghahade sa mga kalangitan sa kaitaasan, asin sa kinaban sa irarom, sa gabos na kadunungan asin pag-ingat, sa kalabawan kan gabos na mga intelihensiya na an saimong mga mata an nakahiling gikan sa kapinunan; Ako nagbaba sa kapinunan sa katahawan kan gabos na mga intelihensiya na saimong nahiling.
22 Ngonyan an Kagurangnan ipinagpahiling sako, si Abraham, an mga intelihensiya na pinag-organisa kaidto bago pa an mundo; asin sa pag-iriba kan gabos na ini igwa nin kadakulon na mga noble asin mga dusay;
23 Asin an Diyos nahiling ining mga kalag na sinda marahayon, asin siya nagtindog sa katahawan ninda, asin siya nagsabi: Sa mga ini Ako maghihimo nin mga tagapagpamahala; nin huli ta siya nakatindog sa pag-iriba ninda na mga espiritu, asin saiyang nahiling na sinda na marahayon; asin siya nagsabi sako: Abraham, ikaw saro sainda; ikaw pinili bago ka pa iminundag.
24 Asin igwang nakatindog na saro sa pag-iriba ninda na kaagid sa Diyos, asin siya nagsabi sainda na kairiba niya: Kita magbabaraba, nin huli ta igwa nin espasyon duman, asin satuyang pagdarahon ining mga materyales, asin kita maghihimo nin sarong kinaban na kun saen sinda puwedeng mag-eerok;
25 Asin satuyang prubaran sinda magpoon ngonyan, tanganing hilingon kun sinda maggigibo kan gabos na mga bagay sa anuman na an Kagurangnan na saindang Diyos iyo an magsusugo sainda;
26 Asin sinda na mag-iingat kan saindang enot na estado ipagdadagdag saiya; asin sinda na dae mag-iingat kan enot nindang estado dae magkakaigwa nin kamurawayan sa kaparehong kahadean ninda na pinag-ingatan an saindang enot na estado; asin sinda na nag-ingat kan saindang ikaduwang estado magkakaigwa nin kamurawayan na ipagdadagdag sa saindang mga payo sagkod sa kasagkoran.
27 Asin an Kagurangnan nagsabi: Siisay baya an sakong ipapadara? Asin an saro nagsimbag na kaagid kan Ake nin Tawo: Uya ako, ipadara mo. Asin an saro nagsimbag asin nagsabi: Uya ako, ipadara mo. Asin an Kagurangnan nagsabi: Ipapadara ko an enot.
28 Asin an ikaduwa naanggot, asin dae pinag-ingatan an enot niyang estado; asin, kan aldaw na iyan, kadakol an nagsurunod saiya.
