(February 1831)
Si Methuselah nagpropesiya---Si Noah asin an saiyang mga akeng lalake nagbalangibog kan ebanghelyo---Dakulang karigsokan an nagdadanay---An pangapudan sa pagsosolsol dae pinagdadangog---An Diyos nagdekreto nin kapahamakan kan gabos na laman sa paagi nin baha.
1 ASIN an gabos na mga aldaw ni Enoch minaabot nin apat na gatos asin tolong pulong taon.
2 Asin ini nangyaring naglipas na si Methuselah, an akeng lalake ni Enoch, dae pinagkua, na tanganing an tipan nin Kagurangnan mapuwedeng magka-urutob, na saiyang pinaghimo ki Enoch; nin huli ta siya tunay na nakipagtipan ki Enoch na tanganing si Noah dapat na magin iyo an prutas kan saiyang mga habayan.
3 Asin ini nangyaring naglipas na si Methuselah nagpropesiya na gikan sa saiyang mga habayan dapat na maggikan an gabos na mga kahadean nin kinaban (sa paagi ki Noah), asin siya nakakua nin kamurawayan sa sadire niya.
4 Asin nagkaigwang gayo nin sarong dakulang taggutom sa kadagaan, asin an Kagurangnan pinagsumpa an daga nin sarong makuring sumpa, asin kadakol sa mga nag-eerok dyan nagkagaradan.
5 Asin ini nangyaring naglipas na si Methuselah namuhay nin sanggatos asin walong pulo may pitong taon, asin nangake ki Lamech;
6 Asin si Methuselah namuhay, pagkatapos siya nangake ki Lamech, pitong gatos asin walong pulo may duwang taon, asin nangake pa nin mga akeng lalake asin mga babaye;
7 Asin an bilog na mga aldaw ni Methuselah minaabot nin siyam na gatos asin anom na pulo may siyam na taon, asin siya naggadan.
8 Asin si Lamech namuhay nin sanggatos asin walong pulo may duwang taon, asin nangake nin sarong akeng lalake,
9 Asin saiyang pinag-apod an saiyang pangaran na Noah, na nagsasabi: An akeng ini maglilinga satuya manunungod sa satuyang gibo asin paghingoha nin satuyang mga kamot, nin huli sa daga na an Kagurangnan an nagsumpa.
10 Asin si Lamech namuhay, pagkatapos na siya nangake ki Noah, limang gatos asin siyam na puo may limang taon, asin nangake pa nin mga akeng lalake asin mga babaye;
11 Asin an bilog na mga aldaw ni Lamech minaabot nin pitong gatos asin pitong pulo may pitong taon, asin siya naggadan.
12 Asin si Noah kaidto apat na gatos asin limang pulong taon an edad, asin nangake ki Japheth; asin apat na pulo may apat na taon dangan siya nangake ki Shem sa babaye na iyo an ina ni Japheth, asin kunsoarin siya limang gatos an edad siya nangake ki Ham.
13 Asin si Noah asin an saiyang mga akeng lalake naghihinanyog sa Kagurangnan, asin nagtao nin pagdangog, asin sinda pinag-apod na mga akeng lalake nin Diyos.
14 Asin kunsoarin na ining mga tawo nagpoon sa pagparadakol sa lalawgon kan kinabah, asin mga akeng babae iyo an pinangake ninda, an mga akeng lalake nin mga tawo nahiling na idtong mga akeng babaye magagayon, asin sinda pinagkua ninda na mga esposa, magin siring na sinda ang nagpili.
15 Asin an Kagurangnan nagsabi ki Noah: An mga akeng babaye nin saimong mga akeng lalake ipinagpabakal an saindang mga sadire; nin huli ta hilnga an sakuyang kaanggutan nagsindi laban sa mga akeng lalake nin mga tawo, nin huli ta sinda habong maghinanyog kan sakuyang boses.
16 Asin ini nangyaring naglipas na si Noah nagpropesiya, asin nagtukdo nin mga bagay nin Diyos, magin kaidto pa sa kapinunan.
17 Asin an Kagurangnan nagsabi ki Noah: An sakuyang Espiritu dae pirme nagtatagal na kaiba nin tawo, nin huli ta siya nakakaaram na an gabos na laman magagadan; alagad an saiyang mga aldaw magigin sanggatos asin duwang pulong taon; asin kun an mga tawo dae magsosolsol, Ako magpapadara nin mga baha sa sainda.
18 Asin sa mga aldaw na idto igwa nin mga higante sa ibabaw nin kinaban, asin saindang pinaghahanap si Noah tanganing haleon an saiyang buhay; pero an Kagurangnan kaiba ni Noah, asin an kapangyarihan nin Kagurangnan yaon saiya.
19 Asin an Kagurangnan pinag-ordina si Noah na susog sa saiyang ordern, asin nagsugo saiya na siya magpaduman asin ideklara an saiyang Ebanghelyo sa mga kaarakian nin mga tawo, nagin siring na ini ipinagtao ki Enoch.
20 Asin ini nangyaring naglipas na si Noah nangapudan sa mga kaarakian nin mga tawo na sinda dapat magsorolsol; pero sinda dae naghihinanyog kan saiyang mga tataramon;
21 Asin man, pagkatapos na sinda nakapagdangog saiya, sinda nagdurulok saiya, na nagsasabi: Hilnga, kami mga akeng lalake nin Diyos; dae mi daw pinagkurua para sa samuyang sadire an mga akeng babaye nin mga tawo? Asin bako daw na kami dae nagkakakan asin nag-iinom, asin nag-aaragom asin ipinagtao para sa pag-agom? Asin an samuyang mga esposa nangarake para samuya nin mga kaarakian, asin sinda man mga makapangyarihan na mga tawo, na siring sa mga tawo nin suanoy, mga tawo nin dakulang kabantogan. Asin sinda dae naghinanyog sa mga tataramon ni Noah.
22 Asin an Diyos nahiling na an karigsokan nin mga tawo nagigin kadakulon na sa kinaban; asin an lambang tawo ipinagpaitaas kan mga imahinasyon nin kaisipan kan saiyang puso, na iyo ngani an padagos na karaotan.
23 Asin ini nangyaring naglipas na si Noah nagpadagos kan saiyang pagbabalangibog sa mga katawohan, na nagsasabi: Maghinanyog kamo, asin magtao nin pagdangog sa sakuyang mga tataramon;
24 Maniwala asin magsolsol kan saindong mga kasalan asin magpabunyag sa pangaran ni Jesukristo, an Ake nin Diyos, na siring sa satuyang mga ama, asin kamo makakaresibe kan Espiritu Santo, na tanganing kamo mapuwedeng magkaigwa kan gabos na mga bagay na mahimong maipagpahiling; asin kun kamo dae maggigibo kaini, an mga baha mag-aarabot sa saindo; daeng pagkukulang sinda dae nanggad naghihinanyog.
25 Asin ini nakapagpasolsol ki Noah, asin an saiyang puso nakukulugan na an Kagurangnan naghimo nin tawo sa ibabaw ni daga, asin ini nakapagpamondo saiya sa laog nin puso.
26 Asin an Kagurangnan nagsabi: Ako an magdedestroso sa tawo na Ako an naglalang, gikan sa lalawgon nin kinaban, pareho an tawo asin hayop, asin kan mga nagkakanap na mga bagay, asin an mga gamgam nin paros; nin huli ta ini nakapagpasolsol ki Noah na Ako an naglalang sainda, asin na Ako an naghimo sainda; asin siya nangapudan sa sako; nin huli ta sinda naghahangad kan saiyang buhay.
27 Asin kaya si Noah nakakua nin grasya sa mga mata nin Kagurangnan; nin huli ta si Noah sarong hustonga tawo, asin perpekto sa saiyang henerasyon; asin siya naglakaw kaiba an Diyos, siring man man an saiyang tolong akenng lalake, si Shem, si Ham, asin si Japheth.
28 An kinaban sarong koraptu sa atubangan nin Diyos, asin ini pano nin biolensiya.
29 Asin an Diyos naghiling sa kinaban, asin, hilnga, ini koraptu, nin huli ta an gabos na laman koraptado na an dalan sa ibabaw nin kinaban.
30 Asin an Diyos nagsabi ki Noah: An katapusan kan gabos na laman yaon na sa atubangan ko, nin huli ta an kinaban napano na nin biolensiya, asin hilnga Ako an magdedestroso kan gabos na laman na mawara sa kinaban.
